【大茶飯】御用經紀有路捉(青冰)
相信跟開青冰的戰友,都知道青冰經常看webbsite裡的CCASS分析,這些枯燥無味的數字,每日都有變化,若然用心看,的確可以看到一些幕後人的手影,由於有T+2的因素,你可能會話數字係後知後覺,但趨勢嘅嘢,遲兩日知都已經夠食糊,何況只要你睇多幾樣嘢作配合,在即市裡或可快人一步,理想達到。
利福中國(2136)早前有品題過,卡塔爾投資局低位悉售後,啟動利福中國瘋狂回購,由4月至6月共回購了1.18億股,涉資4.13億元,股份數目佔未註銷股份前的5.2%,股價亦由2字頭挾到上4蚊,見頂那幾天,正是股東大會後見報,細劉話股價長期被低估,會一直回購至反映資產價值為止。由於上市條例規定,公司回購後必須即日作通報,咁你日日回購,用咩經紀牌真係好易睇得出,再配合CCASS遲來的數據,就知道御用經紀係新鴻基證券,每當股價急挫,見到呢個牌總有穩定的作用。最後一次回購是6月14日,從那天起就不見了御用經紀,股價也即時轉弱,一度隊穿3蚊添,去到6月26日又忽然蒲頭,兩日之後在CCASS果然見到買咗890萬股,而咁啱那天港交所的權益披露,就見到大股東細劉申報增持,之後那幾天的CCASS也顯示御用經紀買貨,權益披露也繼續增持。
同樣的情況也發生在歲寶百貨(0312)身上,歲寶在6月中宣佈同阿里巴巴旗下的盒馬超市合作,將自己的超市零售點租畀盒馬,搖身一變成為收租佬,大股東在6月19日開始連續增持9天,用心看看內裡的股數,及CCASS裡各經紀的持倉變化,好容易就睇得出,御用經紀都係新鴻基證券。
大家可能會話,呢啲都係檯面的事,檯底下唔知仲有咩友好持倉,可能明買實沽呢?這個固然是有可能,但以上兩股個故事都似乎未完,日後真的有動作時,再作定斷也亦未遲。溫馨提示,近來市況差股價殘,不少股份都有回購或大股東增持,但六月底是半年結的公司,最遲要在8月尾前公佈業績,增持或回購,在正式公佈前一個月都不能買貨,這個空窗期令股價少了一個動力支持,如果你的心水股都有增持及回購,空窗期可能是撈底的機會啊。
P.S. 由於未來兩星期外遊,本欄將暫停兩周,7月30日再見。