雅虎香港財經 【大茶飯】愈多指標愈頭暈（青冰）
但凡跌市，都係要美股市場有參與，先至配得上用個股災二字，港股同A股自1月見頂後，持續有秩序的下跌，反而美股就愈戰愈勇，再創歷史新高，基金心灰意冷，不再留戀港股，轉戰美日市場，不過美股就先畀一個見面禮你，啊原來美股都識跌嘅。
當最強的龍頭倒下，市場難免人心虛怯，平時只睇騰訊(0700)及A股做人，現在美股期貨、10年債息、人仔離岸價(CNH)及波動指數VIX，全部都要睇實，頭昏腦脹是必然的。如果戰友唔太了解，可能根本未搞得懂點去睇報價，卻又要用這些數據去幫助自己決策，你話係幾咁危險。
舉個例子，環球的交易員，較偏向看標普500指數，但香港傳媒總愛以道指掛帥，情況有如睇A股走勢，國內及外地都睇滬深300指數，但我們卻習慣看上證指數囉。到你知要睇標普期指，都發現原來有大期同細期，港股恆指細期冇乜人trade，代表性有限，但標普的細期，亦即e-mini，就係最活躍及最多基金及交易員用來對沖的工具，問題來了，查實自己報價機/app入面看到的，係邊個呢？10年債息升上7年高位，傳媒廣泛報導，股債的關係千絲萬縷，究竟債息升對股市孰好孰壞，相信可以寫一百篇博士論文，如果睇幾日的債息走勢就可以預測股市點行，青冰只能講句祝你好運。
我們雖有聯繫匯率掛美元，但本港經濟及港股走勢，相信大家都知係跟邊個的。在外資的眼中，環球的資金配置，早已將中港市場拼在一起，睇淡的話，兩個市場都會沽，再加上我們是自由市場，自然被當作提款機。還記得十月第一個星期，國內休市，港股跌足4日，但美股仲創新高㖭，咁當然美股暴挫，全世界都要跟，但相信日後跟跌唔跟升的情況，仍會持續。
上周暴挫急彈的市，的確刺激，但如果你不是跟車太貼，退後幾步看，弱勢的格局仍未扭轉，恆指穿咗底，自然就更加多人以二萬點甚至更低為目標，因為睇唔到有咩好消息嘛，但青冰又提返你，1月時騰訊衝上476.6元，除咗大師，仲有邊個會覺得上唔到500蚊呢？當日又真係搵唔到咩潛在壞消息啊。戰友們，唔強求摸頂撈底，睇少啲指標，保持輕鬆心情，繼續捱過熊市吧。
