【大茶飯】投資最忌自己呃自己(青冰)
朋友話佢好鍾意搭Uber,其中一個原因係唔需要俾現金, 唔會覺得好貴呀咁,聽落就好明顯係自己呃自己啦, 其實投資都一樣,最忌係自己呃自己。
投資路上各施各法,有唔同的分析,亦有唔同的盲點。 基本分析可以幫助了解公司的財政狀況, 但一間估值便宜又健康的公司,可以係都唔炒,更甚者有時係向下炒 ,財表造假時有聽聞啦,即使唔假,老細被拉,行業政策醞釀突變, 又或者沽空機構伺機狙擊,相信基本分析未必幫到手。
技術分析相對易學,破位追入,穿位止蝕,但實際操作知易行難, 大家都聽過圖表陷阱啦,就係因為太多人睇圖,莊家先可以劃圖, 引你先追入後止蝕,尤其現在港股成交偏細,若然細價股看圖炒賣, 莊家騙你的成本很低,左一巴右一巴,感覺難受,最弊係輸埋信心, 影響往後操作。
青冰係財經科出身,當然係滿腦理論,投身社會後才涉足技術分析, 多年以來,兩種分析都令自己輸過大錢,但慢慢地發現, 分析只是其次,心態才最重要。無論那種理論及分析, 都有錯嘅時候,但點樣去面對錯誤呢,才是大課題。投資失誤, 梗係代表輸錢啦,好多人都會採取逃避的態度,冇事嘅, 市況唔就啫,到個市向上,隻股仲係衰樣,就同自己講估值便宜吖, 隨時追落後,好喇,最惡劣的情況係,已經跌咗好多, 想止蝕但覺得太痛,乾脆報價都唔睇,如果係藍籌股, 就會加多一句:我留俾個女嘅。
以上的情況,大部分人都會經歷過,嚴守止蝕係最有效的辦法, 手風唔順時,一斬即彈係時有發生,青冰試過無數次, 怕佢彈就斬一半囉,好奇怪的,斬咗一半,心態完全唔同晒, 斬餘數總會輕鬆好多。另外,用excel記低每個投資的買入及賣 出價,回報率及佣金支出,養成習慣之後,就好像月結單, 所有數字無得呃人,有助提升日後的操作技巧。