雅虎香港財經 【大茶飯】新股愈熱愈不是股王（青冰）
每個牛市都一定會出現新股熱爆的場面，呢個亦係吸引新丁入場的最佳時機，如果戰友有番咁上下股齡，近期一定會有人問你抽新股的事，由白表黃表的分別，抽幾多手最化算，咩係中簽率，去邊度check分配結果等等。
當然，抽新股都係一種學問，炒開股的你未必會知咩係A組B組，頂頭槌代表申請公開發售部分的幾多%，到你抽中啦，用AO價沽定係臨收市先吃呢，相信坊間甚少人提及，最多只會教你全家總動員，用人頭搏中多幾手，今次就揀幾個講下啦。
新股的AO開市價，及上市首日的全日平均價，是最重要的指標。青冰早幾年曾花了點功夫，將那幾年的主板新股數據歸納，發現在大部分case，跌穿AO開市價及首日的加權平均價，之後基本上係不用再留戀，無他嘅，最大成交都在那些位，跌穿就代表上面蟹貨成籮，再炒上一定要極大力氣，易跌難升呢。
如果有本錢，又或者證券行配合到孖展，盡量也去申請B組頭，按慣例B頭總比A尾的分派比率高，但其實兩者的申請的金額不是相差太遠，所以反正都係做孖展，唔差少少啦。
最後就係招股書，愈熱爆的新股，愈不需仔細看，因為一定高PE上市，甚至未有錢賺，你去分析財表就有點浪費光陰，最後開市咩價，會唔會升五六成，肯肯定同市場氣氛及是否歸邊有關。
不過招股書還是要看的，但就是要看那些無乜人吼的新股，呢啲股隨時一開波就穿招股價，或是花幾個月才完成收集，但一起動就係和味。之前報紙有講十大凍資王，有幾多隻最後變成股王？冇囉。騰訊(0700)、舜宇(2382)及瑞聲(2018)，當年全部跌穿招股價又冇乜人吼的，所以，ipo還是用另一個心態去玩吧，認真，便輸了。
