【大茶飯】本年度十大財經人物（青冰）

臨近年尾，雖然股市幾波動，美股每天都坐過山車，港股升跌五百點已不能登上頭條，今年要驚訝的事實在太多，看來大家都麻目了，但有些財經人物，為青冰留下了深刻印象，今天就盤點一下這十大人物吧。

1. 幣少

   可能在之前的11個月，大家都唔識佢，但過去的周末出盡風頭，無論佢派錢的用心是宣傳定攞威，相信目標已達，至於個FCC，算罷啦。

2. 火姓財經名人

   上月有投資者搵到民主黨出頭，話此君慫恿佢哋買入雲端挖礦合約，懷疑受騙。火生多年以來累積唔少負皮，但仍然無阻佢接連的發展大計，仲要鑊鑊都冇事，相比起幣少，高下立見。

3. 沈大師

   去年被人笑得最多的大師，對港股及騰訊(0700)可謂極之看淡，今年由燈神轉眼成為最可信的人，反而說話趨向保守了，風頭即時被其他人搶走咗。

4. 牙醫

   恆指要見四位數，樓價要跌七成，納指要跌八成，語不驚人死不休，風頭完全蓋過了大師，雖然寫嘢白字連篇，但夠誇張已經有晒soundbite，好可惜出咗書後就冇再在主要報章撰文，令人失望，不過佢的出現，令青冰對沈大師的尊敬多了。

5. 基金經理名咀

   身為大師及牙醫的頭號敵人，今年充分體驗了出得嚟行，預咗要還，相對起其他行家，今年的成績唔算太差，但成也騰訊，敗也騰訊，作為旗艦股高位跌近一半仍然堅守，結果真係要留待歷史作見證。

6. 劉央

   年頭話400蚊撈騰訊，兩年後見一千蚊，早幾星期話騰訊令佢心碎了，但準備好再入貨，小馬哥真係多得你唔少喇。

7. David Webb

   繼去年的謎網50之後，今年再發功幾次，26隻跟華融系相關的股不能踫，更有41隻瀕危港股可能被停牌，不過正常股民都唔會掂嗰啲股嘅，長毛不用太擔心。

8. Dickson

   毛記(1716)三月上市，股東及創辦人都冇上台敲鐘，反而交畀Dickson做，夠晒綽頭，雖然毛記自上市日後高位跌九成，但應該唔關Dickson唔好腳頭事嘅。

9. 曹醫生

   以往呼風喚雨的醫生，上月終於回港露面廉署，但暫時仲未有絲毫動靜，相信來年將有好戲上演。

10. 誠哥

    講真，誠哥同以上九位，完全唔同級數，誠哥講嘢從來都好平實，唔會講得太白但總有弦外之音，三月正式退休了，日後冇乜機會再問樓價及經濟走向，不過只要回想返過去兩年誠哥賣過乜，不言而喻啦。

寫完之後，稍作反思，原來真係要夠誇張才會令人留下印象，睇嚟下年青冰要改吓寫作手法了。

Fb個人專頁 http://www.fb.com/chingbing888