雅虎香港財經 【大茶飯】沈老闆眼光獨到（青冰）
下個月便是I.T(0999)成立30周年，不過剛公佈的半年業績，並沒有派發特別息，連中期息都欠奉，但這個都是他們的慣性，七年以來只派過兩次中期息，每年就一炮過派末期息，以零售股來說，現價5%股息率，算不過不失，隔籬佐丹奴(0709)有十厘息啊，莎莎(0178)及周大福(1929)都有4至5厘，之但係大家的股價都從高位調整咁多，來年經濟前景又灰濛濛，息可能係其次，反而重點應該放在盈利可否維持增長。
I.T中期營業額增長11%，盈利增長88%，照咁睇就好勁，不過用心拆解內裡的細節，算係有危有機。近年內地分部係公司的主要收入來源，佔45%，港澳分部佔39%，但長期都係敗家仔，年年蝕錢，美日分部就貢獻14%收入。內地業務增長訊速，但以往減價促銷的策略，今年大為收歛，所以同店銷售下跌，加上人仔貶值，國內部分的盈利貢獻大跌；雖然港澳分部仍然敗家，但虧損明顯比去年減少，只蝕4800萬；大中華唔得，更彰顯了美日市場的亮麗，做5.7億生意，經營溢利竟然有2.6億，真係一個打晒。
美日咁勁，全靠知名品牌A Bathing Ape，7年前I.T用了2200萬港元收購，證明眼光獨到，這隻猿人被收購後只蝕咗一年，之後年年幫沈老闆賺大錢，今年就係這品牌成立25周年，下半年仲會有更多推廣活動促銷。貿易戰困擾中港經濟前景，但相對來說美國及日本的經濟尚算平穩，尤其美國，所以聯儲局先敢講經濟強勁，加快加息，至於日本係點，可以參考手持Uniqlo的迅銷(6288)，佢哋早幾星期公佈業績，日本Uniqlo經營溢利大升24%，所以I.T日本勁唔勁，應該可作借鏡。
秋冬係服裝股的旺季，I.T以往下半年度盈利總會比上半年高5至6倍，如果今年繼承傳統，全年隨時賺6至7億港元，即係現價只有6倍PE，數就係咁計啦，不過如前文所述，都有一些危機存在。中港經濟下行，相信消費降級係未來的主調，你都知佢哋啲衫都唔平的，究竟在來季有幾大影響，令人有少許擔憂，我哋下星期都仲話有颱風，究竟今年仲有冇冬天呢?美日分部係超勁，但美股接連急跌，會否倒過來影響實體經濟，令美日消費者手緊啲呢?
現時的市況，值博率高的股份唔一定抗跌，不過交到成績的股份，總比亂衝一眾急瀉後的藍籌好，起碼夜晚瞓的安心呀。
