【大茶飯】澎湃北水湧鴻騰(青冰)
剛過去的星期六,蘋果公司殺各位果迷及果農措手不及,預約在門市拿iphoneX的IReserve長開大半日,青冰作為用家,即時火速預約,跟手取消當日爭崩頭預購的訂單,變相提早兩星期有得用,早幾日睇報導話iphoneX生產突破樽頸,富士康近期加緊出貨,相信是真的,而有份做iphoneX訂單的鴻騰(6088),亦會受惠。
早前因iphoneX生產出現阻滯,開售日期推遲兼發貨少,一度拖累鴻騰股價由7蚊跌到去4.50,正式開售後都冇起色,不過股價近兩星期神勇,全拜恆指服務公司所賜。本來恆指中小型股指數,每半年才會作更改,換言之港股通標的,亦都係每年2月及8月才宣佈,3月及9月初生效。不過恆指服務公司早兩星期話,由於鴻騰及眾安(6060)的市值及交易量已達標,所以採用快速納入機制,拎快證下周成為北水股。
對於北水而言,最鍾意就係炒手機概念股,尤其係蘋果相關的,你睇瑞聲(2018)就知,現時持有4%股份了,而準備入恆指的舜宇(2382),北水都係揸4%,所以睇個勢北水就必買鴻騰,只是多與少的問題。
回顧番8月公佈的港股通標的更改,只要係國內元素較重的,好多都升幅驚人,尤其是生效日前後幾天,戰友可以睇番中國東方(0581)、金斯瑞(1548)、民生教育(1569)、中國奧園(3883)、宇華教育(6169)及長飛光纖(6869)當日的表現,一兩成升幅係閒事。
今次拿快證的只有兩隻股,相信資金會更集中注視,眾安早前喪炒後急回,累積的蟹貨唔少,而個消息出咗黎之後都冇乜反應,所以即使知名度較高,鴻騰還是更值搏,配合埋iphoneX出貨量大增的消息,希望今星期破個靚頂,在下周一生效前挑戰上市新高吧。
Fb個人專頁 http://www.fb.com/chingbing888