雅虎香港財經 【大茶飯】無犯規，你好嘢！（青冰）
股票市場有咁多規則，真心要用得著先會有心去刨，最近一個月個市氣氛麻麻，正係裝備自己的好時機，睇咗未必即時有用嘅，但用得著時你就會快人一步，好多時贏錢就係贏在起跑線啊。不過有些時候上市公司即使冇違反規則，實行起來都總會令人大吃一驚，乜原來咁都得，股東只能嘆一聲：你好嘢！
恆大(3333)雖然未公佈業績，但在月初忽然公佈，將召開董事會商討派發16及17年度的股息，春江鴨可能收到風，在8月9日公告前幾天已經炒上，由20蚊附近升到公佈後翌日的28.55元，轉眼升了四成。當你定過神之後可能發現，乜突然可以派番早兩年嘅息咩？
翻查16及17年的全年業績，恆大係有講過只要重組完成，就會在日後派發這兩年盈利的50%作為股息。由於恆大一直想借殼回A股上市，而中證監係規定回A股的過程不能派息，所以恆大啲息一直都係拖住，至於現在忽然派息，有可能意味回A股已受挫。如果你是長期股東，由16年揸到今日，當然係冇問題，袋袋平安，但如果你在去年喪炒至30蚊時食糊，唔好意思喇，由於派息是在嚟緊10月除凈，即使你過去幾年對許生幾咁堅定支持，至死不渝，Sorry這1.287元仍與你無關。
領展(0823)行政總裁王國龍在09年加入，當時股價只係15蚊附近，無論你幾唔鍾意佢哋公司的營商手法，但股價就話畀你聽，市場好受落，無論升市跌市，領展都冇回過頭，而王國龍咁多年來都儲埋唔少股份，而早兩星期就首度沽出股份，減持150萬股，袋咗1.2億元，按傳媒消息，佢沽貨並非看淡前景，而係套現幫子女買樓喎，有父幹真的好啊，不過持股忽然減少了三分之一，始終較難令人釋疑。
更重要係，領展係日日回購，睇番七、八月的記錄，平均每日都回購逾百萬股，而王生沽貨嗰兩日(14及15日)，領展全日成交有586萬股及506萬股，而回購就有108萬股及167萬股，可見每天的回購盤佔當日成交都頗多，CEO分兩日食糊，都佔成交逾一成。你可能會話，領展日日回購，唔通逼住唔沽咩，但又睇番記錄，領展由14年開始玩回購，但實際上係有好多空窗期，撇除那些業績前的限售期，仲有唔少日子揀。
如文首所述，青冰深信佢哋無犯任何規，但睇開波都知道，成日毛手毛腳的球員唔一定經常犯規架，只要醒水識縮手就得喇。
Fb個人專頁 http://www.fb.com/chingbing888
