【大茶飯】熱炒板塊的冷門股（青冰）

三個月前在本欄推介精電(0710)，痴痴地坐到發霉， 踏入五月終於爆升了，三日累升16%，公司轉手後完全未炒過， 呢幾棍值得尊重，有貨在手的即管放長線釣大魚。 精電的新東主京東方，係國內面板顯示的龍頭企業，近年已埋手研究 OLED呢個下一代技術，老闆講到明唔會再投資TFT-LCD的 生產線，換言之依家做緊嘅TFT，會慢慢交晒俾精電做， 未來一兩年應該都不愁無生意囉。

講開OLED呢個技術，就要講下Universal Display(Nasdaq代號OLED)， 佢地以專利授權及技術轉讓方式同OLED生產商合作，三星、LG 及SONY幾間大廠都係採用佢嘅技術，換言之愈多人用佢就愈發， 上周五出季績靚爆，股價單日急升24%，今年累升97%， 如果你係佢嘅股東，應該都發咗。

雖然OLED面板市場潛力大，但三星已經獨霸9成供貨市佔率， 盛傳今年推出的iphone 8亦都會採用OLED顯示，冇計，都係要低聲下氣同三星攞貨， 難怪之前傳過蘋果想搵京東方合作啦。港股的相關概念股不多， 較多人認識的是信利(0732)，但冇乜人提嘅億都(0259) 可能仲正。

億都上市超過24年，但作風低調，業績不過不失，息率不高， 最特別的是旗下兩間附屬公司，南通江海在深圳上市，現時市值77 億人仔，億都手持32%，約值28億港元。另一間公司係維信諾， 並無上市，但就係做OLED，其技術係來自清華大學，勁喇呱， 不過早幾年因為業績唔掂，億都將維信諾的投資撇賬，依家OLED 業務轉佳，公司又將投資回撥了。

現時億都市值38億，無負債，如果南通億28億，咁OLED就真 係半賣半送俾你喇。上月有投資者先後行使了4000萬股opti on，個價係2.5元，睇番CCASS手影， 相信貨源在安信證券，佢地上月在兩次行使之間酌量沽了5百萬股， 似乎唔想因持股超過5%而作披露。近月科網股咁旺場，隨時炒到O LED概念，冷冷地嘅億都，隨時跑出。