【大茶飯】珠船食正大灣物流（青冰）

港珠澳大橋即將通車，驟眼看珠船應該係受害者，因為大家可揸車自然少咗搭船，但其實佢地最煞食嘅係在港珠澳區域建立的港口物流網絡，及發展南沙物流倉儲。

前兩日廣東發改委主任何寧卡，在廣東省人大會議的記者會上透露，大灣區發展規劃綱要已經完成，將在近期出台，連我地財爺波叔都在網誌抽水，大談大灣區對港青的意義，睇黎更具體的公佈，將在農曆年前後曝光。兩星期前推介的龍光(3380.hk)，冒著被大行及傳媒唱佢急須配股的淡風，仍然升逾三成，再睇另一隻大灣概念內房時代地產(1233.hk)，兩周升18%，佢地近日明顯跑贏同業，似乎醒目資金都認同青冰的推論，偷步入市。

除了內房，珠船(0560.hk)可能係一個冷門選擇。呢隻老牌紅籌，在港上市逾20年，一向都較為低調，所以資產長期折讓，但業務卻是穩定的，現金流高，息率唔錯，簡單啲講，穩而悶。港珠澳大橋即將通車，驟眼看珠船應該係受害者，因為大家可揸車自然少咗搭船，但其實佢地最煞食嘅係在港珠澳區域建立的港口物流網絡，及發展南沙物流倉儲。

青冰在網上搵料，發現佢地在上月參與了國內知名網站搞的「決戰港股」路演，一間平常低調的公司，都增加曝光率，似乎係想發圍。路演中最有趣的環節係問答，有提問是單刀直入，問點解上月中有一日突然急升三成，是否有注資或重組進行，官方的答案當然話以公開的訊息為準，不過母公司的優質資產，包括南沙物流園、造船修理及金融企業，都會考慮。以佢回答的次序推論，南沙物流園應是首選。

大橋通車會帶旺大灣區經濟，日後貨運量及進出口定必更頻繁，擁有已建立的物流倉儲肯定受惠，所以注入南沙物流園，係食正大灣概念。近年珠船長債甚低，只有數千萬，但在8月公佈的財表中看到，長債增至2.5億，手頭現金亦增至10億元，係咪將有動作呢？一隻平時悶開嘅股，忽然急升三成，成交有2100萬股，沒有通告亦沒有新聞，現時股價回至2.08，PB是0.8倍，如果要批股注資，不能賤賣國家資產，1倍PB是最基本，炒至2.59絕不過份，說到底，現時是大牛市，又有大灣概念光環嘛。溫馨提示番，15年大時代，悶股珠船在兩個月內由2蚊炒上4.85元，現價是否值搏，自己諗。

Fb個人專頁 http://www.fb.com/chingbing888