【大茶飯】知名網站唔跟都要睇（青冰）

尤記得國內知名網站在2015年港股大時代，無論佢地推咩股，必然裂口高開，有戰友更統計過，夠膽AO時段買入，仍然有得執，當然後知後覺的難免會接火棒，但旺市當中，接了你火棒的，可能比你贏得更多啊。

雖然青冰在工作上有彭博資訊機，但講到國內的突發資訊或傳聞，還是睇國內網站的新聞直播區，雖然佢哋係轉載，算係二手料，但仍然比彭博快，如果在這個北水的年代，戰友只睇本港財經網或app，難免落後於人。

如果你有睇開國內網站，都必定拜服佢地的長文寫作，的確好詳盡，即使你對某股零認知，睇完都可以成為半個專家，當然結論十居其九都係睇好、轉勢及被低估之類，但對於想認識某公司，又不想自己爬港交所披露易，他們是具可讀性，但切忌被他們洗了腦，乜都跟衝就大鑊了。上市公司多在這些國內財經網站曝光，提升企業形象之餘，之後做路演，要配股集資再發展，有莫大裨益，所以都算係投資關係的一種。

早兩日有戰友在fb問點睇聯眾(6899)，星期五大成交突破云云，留意番呢隻野在星期四晚上財經網站是有品題的，翌日有異動是正常不過，睇番個圖表亦是甚靚，一定引到唔少圖表派入市，但奈何破位高追者暫仍是蟹，所以多看一點勤力一點，永遠有益，即使唔賺錢，亦可減少中伏的機會。

其中一個知名網站在本周會舉辦投資峰會，不少國內重量級公司贊助及參與路演，每間公司都可以寫幾句描述自己，大部分都沒看頭，而最吸睛的是上市兩年的彩客化學(1986)，佢話「2017年成功進入鋰電池材料領域」，青冰即刻研究下啦，原來今年先開始投資該業務，唔怪之得冇炒過，要繼續發展，應該需要抽水，參加路演非常正路，峰會星期三舉行，戰友自己關注下吧。
Fb個人專頁 http://www.fb.com/chingbing888