【大茶飯】芬佬份工唔易做(青冰)
散戶成日笑財演,話佢地冇料,講嘢又模稜兩可,但青冰都要為佢哋平反少少,一日被問十幾廿隻股票,唔通隻隻都會熟咩,上到節目更加唔可以答你唔識,咁唯有俾啲片面嘢你啦,想要深入嘅分析,應該去搵個分析員問嘛,拎廿幾頁嘅report睇,一定有得着,但真心問,大部分散戶都係想食快餐,問目標價幾時食糊,潛緊水嘅就問有冇機會返家鄉,咁模稜兩可只係切合市場需要吧!
財演的前身,應該係分析員,但在本地市場,呢個崗位已經沒甚出路,砌個模型,估企業前景及純利,寫份長長嘅report,唉,仲有邊個會睇,如果你外型OK又講得兩咀,已經俾人搵咗去做財演,久而久之,你講嘢嘅時間會比你研究嘅時間多,慢慢地就會乾塘,言之無物,跟住見到身邊行家都撈得好掂,耳濡目染,更加唔會再花時間去做研究,下次飯局問冧把仲實際啦。
真心佩服有些前輩,毅然抽身,走去起壇搞自己嘅基金,真正落場搏殺。投資市場是很殘酷的,做芬佬要面對的,除了是市場,還有客戶、行家及傳媒,壓力非外人能道。無論是股評或是財演,推完一隻股,得唔得都係閒事,因為股市日日有,呢隻唔得,下一隻掂就可以,冇得輸;但作為芬佬,真金白銀落場,揀錯就是輸錢,要止蝕還是死守,好考功夫,因為輸錢,就代表你的籌碼少了,下一隻要贏仲要贏凸埋上次,這種壓力你懂嗎?
最弊嘅係,隻基金每月要結數,表現無所遁形,仲要列出過去幾個月、半年、幾年、成立至今的表現,再拍埋benchmark指數一睇,無論你投資理念幾咁冠冕堂皇,都係冇用。今年港股咁堅,不少芬佬都會沾沾自喜,但如果俾青冰去分析,一定會睇過去三年表現,大時代那年你能否力保不失?去年悶市陰陰落你有冇賺錢?今年表現是否跟到恆指?三年都掂嘅,才算是大師傅。
不瞞你說,青冰都係芬佬,不過個芬就係自己的家庭基金啫,哈哈。
P.S. 以上所說會為表現憂心的芬佬,不包括本港大部分的強積金,完。
Fb個人專頁 http://www.fb.com/chingbing888