【大茶飯】萬劍歸宗在騰訊（青冰）

No. 12: Tencent

(The Canadian Press)

如果你有看過風雲，一定知道甚麼叫萬劍歸宗，係無名的絕技，此招一出，其他劍如見主人，劍氣撲向宗主。講到好似好深咁，其實係形容緊早幾日科技股散水，唯獨股王騰訊(0700)絲毫未動，啲資金撲向主人，當佢係資金避難所，由於瑞聲(2018)單野仲未搞掂，呢個陰霾似乎繼續有利騰訊再闖高峰。

咁嘅開場白，應該估到青冰係講騰訊喇，係，咁大隻股王，日日升，係人都知佢係科技龍頭，仲有咩好講呢。騰訊現時業務好廣，有支付業務、手遊、音樂娛樂、社交通訊及文字內容等等，情況有如廿年前的和黃，咩業務都有，睇佢盤數難過登天。但睇巨企，不需睇到咁深入及複雜，簡單就是美，還記得當年和黃憑甚麼一炮賺千億，股價衝上歷史新高，全因出售歐洲電訊業務，當年的和黃，就只需要睇電訊，而現時的騰訊，就只需睇手遊。

騰訊首季收入495億人仔，遊戲收入有228億，非常誇張，佔近一半，就以手遊來說，同比增長57%，主要靠王者榮耀帶動，呢隻game在2015年底發行，年半以來吸金力極高，去年9月仲開展埋「王者榮耀職業聯賽」，即係電競。對於香港人，職業打機可能係較陌生，不過在外國非常盛行，國內都開始興起，男人嘅野，打機一定係唔衰得，為咗唔輸俾人，課金係可以好瘋狂的。以前打機一定冇現在咁方便，你去開會，隨時見到幾個年青人低頭打機，正當你想鬧佢地廢青之時，有冇諗過佢剛剛按咗幾按，已經課咗幾千銀買道具?

聽朋友解釋，王者榮耀其實都唔算原創吖，都係向國外遊戲Dota致敬，係唔係真都冇關係啦，騰訊以QQ起家，咁QQ咪又係向ICQ致敬囉。還記得去年騰訊去年收購了芬蘭手遊商Supercell，有國際遊戲市場分析公司Newzoo就估計，騰訊去年全球手遊收入市佔率有10%，Supercell則有13%，日後會唔會將Clash of Clans本土化而取得成功，又會唔會索性將Supercell併入騰訊財表，又會唔會將整個手遊分拆出黎呢? 木宰羊，但從今天起，大家應懂甚麼才是騰訊的命根吧。