雅虎香港財經 【大茶飯】董伯伯的厚禮（青冰）
中遠海控(1919)終於正式出價，以每股78.67元，收購董伯伯的東方海外(0316)，較上周五的收市價60蚊，有31%溢價，早前一直傳國家會向香港送大禮，大家梗係以為是債券通喇，原來送俾董伯伯個份禮仲厚，呢單刁傳咗幾個月，可謂成街都知，大行先後唱好前景，係唔係預早收到風，自己諗。
中遠海控現時市賬率1.97倍，收購東方海外，係作價1.39倍P/B，唔算太貴，收購完成後，佢地將會成為全球第三大航運公司，作為未來一帶一路的重要佈局，算係好刁。美國經濟逐漸復蘇，航運業今年係明顯好轉，所以又係時候重推太平洋航運(2343)喇。
青冰早幾個月曾經在本欄推介，當時波羅的海指數由2月的700點升至4月的1338點，有晒當炒的因素，之後的首季營運數字，都係理想，可惜股價表現令人失望，5月低見1.31，青冰也只好嚴守止蝕走人。及後波羅的海指數連跌3個月，去番822點，但近日太航股價又回穩番，近日更回升至4月的價位。
現時太航市賬率0.86倍，相比起董伯伯被收購的1.39倍，有好大折讓，雖然太航被收購的機會唔大，但咁大程度的折讓，再次反映現價係值搏的，去年上半年係蝕5000萬美元，下半年係蝕3700萬，早前CEO曾經講過，只要維持首季的表現，將可回復盈利水平，換言之，盈喜可期。而青冰用彭博資料計過，太航在過去12個月底的平均市值，高於50億港元，即係話佢都有機會加入深港通。有董伯伯大刁在前，希望可以刺激市場重新為太航估值吧。
