【大茶飯】識玩一定玩蘋果（青冰）

家股神巴菲特最睇好的股票，係蘋果，坐擁幾千億現金，業務穩定，仲市傳睇中急需現金的Tesla，想收購或者入股，但講到最鍾意蘋果的，肯定是中國人啦，大家都知iphone最大的市場，就是內地，加上其他周邊產品，無論係炒定自用，中國人愛蘋果並非虛言，估唔到呢份愛已經推展到另一種境界，係食得嗰隻蘋果。

蘋果期貨去年12月在鄭州商品交易所上市，係全球首個蘋果期貨市場，亦係第一個鮮果交易項目。青冰上網搵過相關新聞，當日中證監係咁講，蘋果的主產區與中國重點扶貧區域高度配合，支持貧困地區經濟發展。好喇，扶貧是否成功就未知，但十月交割的期貨價格在4月頭係6400人仔，升到上星期五的9278人仔，升幅達45%，如果拍埋近期喪炒的油價，蘋果肯定更瘋癲。

近日的消息係，受幾個主要產區的天氣影響，預計秋季的蘋果產量會少三成，所以投機者係咁掃，真正的挾爆空倉，因為你沽咗期貨，到時真係有可能冇足夠的蘋果去交收，一手期貨要10噸啊。上星期有幾天的成交額逾二千億人仔，再發展落去，成交金額可能會追到上海股市。聽落個數就誇張啲，心諗一年都未必食到咁多蘋果啦，但其實睇真啲，我哋恆指期貨每日成交張數約20萬張，呢度係約3100億成交額，用兩者一比，你就知蘋果有幾瘋炒了。

期油上升，可以炒三桶油及油服股，鋁價上就梗係中鋁(2600)，銅價漲就買江西銅(0358)，蘋果期貨急漲，當中最相關的是做濃縮蘋果汁的是安德利果汁(2218)，原料價格上升，按理應該增加生產成本，不過都睇下你有冇能力向客戶加價，再睇番股價，由長期企在4蚊冇乜成交，至踏入5月接連上漲，上星期都升到5蚊了，不過成交量仍然係極低，似乎炒蘋果期貨，仲比安德利值博，起碼止蝕都有盤接吖。
Fb個人專頁 http://www.fb.com/chingbing888