香港股市 將收市,收市時間:1 小時 46 分鐘

【大茶飯】賭王榮休風雲再起(青冰)

賭王何鴻燊將退任澳博主席 女何超鳳接棒

賭王何鴻燊榮休,卸任澳博(0880)主席,由二房的超鳳接任,四太及霍震霆則任聯席主席,並會提名三太入董事局,表面上是何家大團結,但就如摩根大通分析指,不同的利益集團將帶來更多不明朗因素,是好是壞暫時未知,但四太在澳博的影響力將會大減,成為較明顯的輸家,而為何早年多番鬥爭,現在各方肯合心協力(至少表面上是),可能預示了往後會有更大的挑戰,不得不同舟共濟,而青冰估計是跟賭牌有關。

兩星期前青冰曾在報章專欄分析,中美貿易戰會影響賭牌續牌事宜,原因是現在三正三副的賭牌,美資控制了三個,在阿爺眼中,重新洗牌的誘因極大,其實六個牌入面,亦有三個同賭王家族相關,而佢地都係同前特首何厚鏵及上海那邊較熟,咁現在習大大長揸話事權,順便洗埋你地都好正路。  

這幾天看報章,話二房大勝,手執三間賭業公司,唔知係咪記者唔太了解美高梅中國(2282),美國美高梅現時持有56%,何超瓊只是聯席主席,持有22%,可能營運上佢係有較大話事權,但點講都唔應該係老細囉,超瓊在兩年前曾減持5%股份,亦似有淡出的意途添。事有湊巧,在賭王退休出通告前兩天,北水連續兩日大手減持美高梅中國,周三減持486萬股,周四更打入滬股通十大,錄得1.7億元的凈流出,推算約有880萬股,睇番數據北水4月初持有3956萬股,咁兩日就走咗三分一,會唔會係收到風何生榮休,北水估超瓊也遲早悉售美高梅,重回澳博呢?

中央及澳門政府多次表明,賭業都要兼顧多元化發展,協助成為旅遊消閒中心,何家幾間相關賭場,新濠(0200)相信係最多元化,最具條件留低,相反澳博就只有賭賭賭,路氹上葡京遲遲未完工,隨時傾續牌時都未開得,認真尷尬,所以叫齊幾房番去幫手抗外敵,是順理成章,亦話唔定新濠日後將設施轉售予澳博,咁澳博咪多元化囉,留意番新濠去年向澳洲皇冠集團購回新濠博亞的11%股權,正式分手,往後有咩大動作,唔需要向外人交代了。 

前青冰做功課時,曾看過外媒評論,說中央有意在續牌時引入內地企業,幾大內房如恆大(3333)及萬科(2202)近年積極搞旅遊消閒業務,入股或接手都有助業務發展,雖然青冰心裡暗說:唔係呀嘛?但既然海南都可以發展體育彩票及賽馬等,政策有轉變,有咩唔可能呢

Fb個人專頁 http://www.fb.com/chingbing888