【大茶飯】難為正邪定分界(青冰)
股市每天都有新奇事,今星期青冰又學到嘢,原來沽空機構唔一定沽 空,匿名者出報告撐瑞聲(2018),矛頭直指葛咸城,世事又會 如此巧合,瑞聲同日開記招澄清,翌日復牌,幾日已經重上100蚊 ,瑞聲停牌半個月,係要搵資料反擊定係搵匿名者,自己諗。
5年前出報告沽空恆大(3333)的Citron Research,星期五又有目標,不過今次係美國晶片股NVI DIA,佢地以電腦顯示卡起家,之後發展以圖象處理晶片為主,XBOX及Playstation都係佢嘅客人,只要你有少少宅, 都一定聽過佢個名。無長篇大論,講嘅野簡單易明,冇假數冇隱瞞賬目,只係指出NVIDIA升得實在太多,已經充分反映好消息,機構投資者持股由年頭的87.5%跌至71%,所以現價買無疑係入賭場,而唔係一個投資。但報告的重點在於,佢只係叫你食糊,換馬去Alphabet(即係Google),唔係叫你空NVIDIA。
Citron創辦人Andrew Left舊年被證監重罰,5年內不得在香港買賣證券,原因係沽空恆大的報告使用誇張的言辭,具誤導性,引起投資者恐慌。當年報告 一出,股價曾經大跌20%,股價低見3.60元,5年過去,恆大上星期高見17.66元,報告話佢地無力還債,咁斷估應該唔係,上星期仲用新債換舊債,息率仲要低咗,係呀,佢地負債仲三千幾億元,不過你敢沽空嗎?一個月未夠已經升一倍,證監禁Citron其實都係救咗佢,否則一定傷亡慘重。
青冰覺得,沽空機構同投行出報告,其實都冇乜分別,只係方向唔同 ,如果唱好的報告係誇張言辭,具誤導性,引起投資者Panic Buy,唔知證監會唔會拉人呢?而散戶較難在沽空中獲利,更甚者揸咗貨仲會損手添,正所謂阻人發達尤如殺人父母,大奸角就逼住係佢做架喇,咁證監打奸人一定贏掌聲嘅。奸人最後只能慨嘆一句:「 搵食啫」。
Fb個人專頁 http://www.fb.com/chingbing888