【大茶飯】預設立場容易中伏（青冰）

聽落就好似好悲，但青冰仍相信今年牛市未完，短期最需要的就是等市場信心回復，可以係一個好消息又或者一個好業績，扭轉大家由觀望去番入市。

一個星期的小股災，乜嘢原因觸發跌市，點解跌咁多，其實都不太重要，最重要係你有沒有一套應市的策略，撈底定止蝕，唔應該係這個時候才去問的。1月時市面上幾乎一致看好，慢牛長升大漲小回未驚過啦，點知隻牛食錯藥，愈跑愈快，慢慢就挾到大家改變策略，持股比率過高，甚至周圍求冧把去買，青冰也轉做大時代mode，盡量找尋新概念，結果一個急的調整浪，大家都要在海中搵番條泳褲，幸好青冰嗰條跌到落小腿度，仲有機會俾自己即刻着番。

最堅實的牛市投資者及評論，應該已紛紛轉口風，減持或離場觀望，其實絕對冇問題，操盤上不應該有預設立場（牛市冇咁快完），否則很容易中伏而不自知，你睇沽空VIX指數相關工具的人，個預設立場就係VIX會長期低企，所以在2月2日忽然抽升，只係引更多人沽空，而不是去止蝕。

相信現時的市場共識，都只係一個較深的調整，企業盈利向上，A股加入MSCI在即，加上仲有好多重磅IPO為咗同股不同權而來，無論從經濟及政治的角度，依家爆咗煲的確係添煩添亂。回望番2007年的國企大牛市，由7至8月的調整，恆指由高位回落18%，跌穿埋200天線，指數都回得咁深，可想而知其他股份係幾咁傷亡枕藉，如果今次跌市要跟番07年，18%的回調就要見27457點，而現時的200天線就在27974點，可能早一個星期同你講，大家都覺得邊有可能啊，但上星期五最低都見過29129點，波動市一日都可以跌一千點，幾日內到站唔係冇可能。

聽落就好似好悲，但青冰仍相信今年牛市未完，短期最需要的就是等市場信心回復，可以係一個好消息又或者一個好業績，扭轉大家由觀望去番入市，如果你之前係冇乜貨在手，趁近期急跌係可以入市的，但青冰一貫的操作都係等動力回來後才作進擊，以免在陰跌市消磨意志，咁倒不如提早收爐，講句新年快樂，身體健康更好啦，各位狗年賺多啲！

Fb個人專頁 http://www.fb.com/chingbing888