雅虎香港財經 【大茶飯】CDR抽資效應（青冰）
上周中國證監批了六間內地基金公司的「3年封閉運作戰略配售靈活配置混合型證券投資基金」申請，個名廿幾個字相當難記，但可簡稱為CDR基金，每家產品集資上限為500億人仔，最低為50億，預計6月11日開始認購，用最牛的角度睇，呢度可以抽走3000億資金，對中港股市影響不少，但似乎比較少人將佢聯想到上周五的跌市，因為大家都慣咗用「升得太多」、「恆指去到阻力」、「世界盃效應」等藉口，甚至話美國決定打騰訊(0700)。
青冰早一兩星期已經講世界盃月，市況應較淡靜，對大股唔應該抱太大期望，但指數跌五百點，騰訊跌3%，要睇波都唔會沽咁狠吧，唔通拎幾十億去買波咩，所以CDR的到來，應是對港股受壓的最大原因。
最近A股的IPO市場十分之熱鬧，藥明康德及富士康熱爆上市後，今天就到電池王寧德時代，人保又已準備好回歸A股上市，所以在首隻CDR小米上市前，市場資金仍然會非常緊絀，所以你會睇到北水在周四及周五狂沽騰訊，兩日共凈流出30億，班師回朝味濃，如果你仲相信北水因美國要查騰訊而沽，實在太睇唔起大媽了，睇番中興(0763)及聯想(0992)，大媽那會狂沽吖？
本星期大事十分多，侵侵同金仔在新加坡會面，聯儲局議息，按現時香港短期利率的走向，似乎今次必跟無疑，加息後便是世界盃開鑼，再加埋CDR抽資，有理由相信，大股在未來幾星期都係呈上落市，升得多唔好追，回得多又唔怕撈，青冰會繼續留意中小型股份，應該在靜市中搵到食。
執筆之時睇到太古以64%溢價私有化港機工程(0044)，涉資30億元，相信市場又會開始尋寶，炒下私有化，不過炒還炒，要適可而止，你睇港機個圖就知，真正的私有化，只會出現在絕望時，其他大折讓股，尤其是港資地產，別要短炒變長揸呀。
