雅虎香港財經 【姿色中環】股市陣痛只會越演越烈（Samantha）
各媒體將股災30周年和逾500點的跌市連繫埋一齊，那即代表啲咩？就是誰也難為跌市砌出一個較合理的理由，當然絕不是加泰威脅宣布獨立。稍為似樣是牛熊證街貨比例，牛熊昨日街貨比例為75：25，資金都賭升，當47隻藍籌踩油向下，大量牛證街貨量 (相當於3059張期指)隨即同大家講拜拜。
2017年對股民最深刻的教訓是，就算唔做好，亦唔好隨便做淡，挾死無命賠。這反而鍛練出好友韌力驚人，無它，因為年初至今利潤豐厚了，皮下脂肪厚了，起初大戶只需要拎條藤條出來鞭擦一下股民，大家就會識驚。
但問題人類是會進步，今次震得走，下次要篩走班意志不堅的人，要越來越用力，例如上次300點股民已識驚，今次要跌逾600點，創近一年最大跌幅，市場才會稍稍驚起來。單憑昨日重貨區是28100點至28199，就知道大家睇好幾咁堅定，大家均認為600點跌市幾近不可能，才殺大家一個措手不及。
港股急挫，今次回報又再次被打回頭，Samantha向來都係保守mode，上次拎藤條，難保下次不強勢亮刀見血，市場才識驚，故頭盔都係帶穩好。
一個理由牽強的跌市，換來只是技術性調整的結論，基金當然可以說一兩天跌市不足為懼，因為買貨早，如果貨底早於上半年儲起，今日500點跌幅的確唔需要太驚。
問題是對一班最近兩星期才買入的二三線股股民來說，今日可能已經要中伏，望住自己的買入價，輸錢感覺並不好受。Samantha眼下的策略是，中長線（起碼坐幾個月）的重磅股守住先，至於二三線股就嚴格執行15%止蝕，留得青山在。
