【姿色中環】走鬼過後... 搵即日鮮復仇!(Samantha)
本周Samantha靜到好似失咗踪咁,向大家賠罪,小妹本周考試,再遇著跌市,一邊温書一邊在報價機前沽貨,忙到不可交加。本周二,一個好似跌極都跌唔落的股市,在A股拖累下終被拖下海,一些板塊股份跌幅動輒半成,指數相較之下已算平靜,基於「跌唔落」的認知在過去3個月深深印進腦海,連止蝕的動作已變成慢半拍,導致沽不到靚價,今次最大的教訓是長期準備Plan B是必要,當市況向相反方向走,心中一定要設下個「格殺勿論」價。
那當然,打完靶港股又可以再無厘頭挾升200點,前幾日的標題明明是「監管風聲緊、温州幫散貨」,「郭樹清為影子銀行去槓桿」,「美軍三艘核動力航母下周將齊集朝鮮半島」,「法國大選有機會最終由極左對戰極右」,個個理由都足以翻起千重浪,但,Samantha都明白市場Being right for the wrong reason,唔多理性。Samantha深信,要升穿晒之前的阻力仍是有相當的難度。
首季升市走過來,Samantha有足夠彈藥去誘使自己唔出手,前幾日清貨有一半cash等買野,大手掃貨時機希望是五月中至尾段,呢一個月應該要點做?所謂今日唔知聽日事,最好極短炒,即日鮮。
Samantha今日向大家提吓隻上海復旦(1385),唔係創仔兼剛剛發盈警那隻,它從事中國IC設計和系統集成業務,賣點一,業績有錢賺有增長,收入為11.87億元(人民幣‧下同),按年增14.2%,純利為2.13億元,按年上升33.6%,毛利率為53.2%,去年同期則為52.9%,受惠於高毛利之產品市場比重增加。
賣點二,產品以基本民生為主,不太受經濟環境所影響,加上已參與政府項目多年,收益穩定。賣點三,該股上周四一口氣踢穿逾三個月的橫行區,近幾日回吐整固,一旦升穿6.05元的水平可買入,博短炒一成食胡,鑑於成交偏薄,小注博爆升是較佳的選擇。