香港股市 將收市,收市時間:3 小時 5 分鐘

【庫房水浸】如果忽然有6K 買什麼好?

政治嘅嘢一日都嫌長,想當年鬍鬚曾堅持輸入6K落大家MPF戶口,隔幾日就投降決定派錢。所以大家對於政府派錢還富於民仍可以抱一絲希望,假如真係忽然有6K,究竟用來買乜好?

先講穩陣策略,得6K用來藍籌股唔夠數,倒不如盡買儲稅券。皆因以政府審慎理財原則,如果決心派錢,退稅方面或會手緊,打工界的交稅萬元戶今年交稅額度將可能創新高。想減輕交稅災情,最好趁早用盡6K買儲稅券。

當然對習慣搏殺的香港人來說,上述策略未免太消極,既然6K係意外之財,就不如押注風高浪急投資。最刺激當然係玩牛熊證,只要稍為睇錯市,一、兩日即可以財散人安樂。又或押注財金猛人經常警告係泡沫的加密貨幣,嫌Bitcoin太大路,可考慮RippleLitecoin這兩隻有波幅有交投的後起之秀。

假如你自問組織力強兼老友多,亦可以牽頭集資投資磚頭。以入場費最低的電單車位為例,深井某豪宅盤電單車位索價19.8萬元,只要你搵齊33人夾6K即可上車,樓市繼續熾熱的話,大半年後分分鐘可以33萬元摸出,埋單分賬足夠大家去多次日本。不過這方法或涉及大家聯名開公司並要處理買賣手續,假如爛尾或坐艇,更可能令你一夜之間多了33名仇人,想到這後果,相信唔少人都會縮沙了。

當然尚有一項上佳的資金出路,便是用來孝敬爸媽,特別是平日唔多俾家用的後生打工仔,難得忽然有6K,既可以選擇直接回饋父母,又或用來資助父母旅行,這一著肯定大大改善你與父母的關係,性價比無得輸也。

===============

財經精選資訊網站「中環街市」  臉書粉絲頁