【我係邪惡HR】你公司對遲到有幾執著?(HR小薯蓉)
老細永遠都要求員工每朝準時起身、準時返到公司、準時開始做嘢,但千祈唔好準時收工。呢個不文明規定已經深深烙印喺打工仔嘅DNA裡面。好多公司為咗確切咁執行老細呢一份執著,都會訂立好多準時上班嘅規則要求員工遵守,而當中有啲都幾執著,唔知你公司有冇以下呢啲呢?
1. Print交通新聞
香港人多車多,返工時間交通擠塞都係十分常見嘅事。加上樓價高企,大家住得離市區就越嚟越遠,「因為塞車所以遲到」呢個理由相信大部分打工仔都用過。不過,聽過有好多公司都要求員工如果因為塞車而遲到,必須要交埋塞車相關嘅新聞出嚟,證明塞車呢單嘢唔係老作,如果交唔到就當遲到論,等收warning letter啦。
首先,其實我諗唔係每一個地方塞車都一定有新聞報導,而且,如果員工返到公司已經遲咗,仲要花時間上網搵下有冇塞車嘅新聞,其實浪費嘅都係做嘢嘅時間。最慘核實嘅責任會交咗畀HR,變相又花更多人手去處理,其實係咪真係有咁嘅必要呢?
2. 嚴格遲到分界線
如果要嚴格執行工作時間嘅規定,當然要劃分一條分界線。有啲好少少嘅公司可能有10至15分鐘buffer,但有啲公司就好嚴謹,遲到一秒鐘都係遲。明明只係搭𨋢停多咗幾層,遲咗幾秒鐘就要收warning。每個月有幾日遲幾秒鐘就收幾次warning,幾秒變成不良員工不是夢。
3. 遲到要做身體檢查
為咗嚴厲咁執行準時上班,所有嘅遲到達三次嘅員工都必須前往人事部進行紀律聆訊,亦即身體檢查—照肺。佢地會好關心員工遲到嘅原因,提議你早睡早起,然後協助佢過返「正常人」嘅生活,真係好有心㗎。
不過,到咗今時今日,XYZ世代已經投入社會,面對更嚮往彈性工作嘅佢地,以上講嘅都可能成為趕走員工嘅一大武器。好多公司都開始實行彈性上班時間,又或者容許home office,仲行緊硬性規定嘅公司,到底係咪時候需要踏出改變嘅一步呢?