【我係邪惡HR】如果你老細有呢種請人傾向⋯（HR小薯蓉）

【我係邪惡HR】如果你老細有呢種請人傾向⋯（HR小薯蓉）

身在人力資源部，憑住日常溝通，你好容易睇到唔同部門主管嘅招聘傾向。有啲主管要求極高、有啲就比較隨意，但其實無話邊種風格好，邊種風格唔好，請人就好似搵伴侶一樣，係要搵個「對的人」，最怕嘅係主管嘅招聘傾向係搵個「錯的人」。

主管遊麥菜喺公司出名好人，面面俱圓，幫佢請人一直都好少畀說話我聽，合作起嚟都算幾舒服。遊主管呢個部門出名工作繁忙，幸好下屬都係一批年輕有拼勁嘅員工，不過，近年佢個部門變得好唔穩定，好多喺佢部門工作能力不俗嘅同事都相繼離職，後來從Exit Interview發現，佢部門同事離職嘅原因原來同遊主管嘅請人方針有好大關係。

起初由一兩位有能力嘅同事離職開始，佢地離職後嘅工作好自然就由其他同事分擔。由於工作繁忙關係，急需聘請新人去替補。好不容易，遊主管終於請到啲人返嚟，但同事好快就發現，遊主管請返嚟嘅新人都係一啲追求穩定，極度聽話但工作能力一般嘅同事。

因為呢啲新同事能力一般嘅關係，好多工作都需要舊一批能力較強嘅同事去分擔，亦要花更多時間去照顧呢啲新同事。好快呢班舊同事當中又再有人離職，而遊主管招聘返嚟嘅同樣係追求穩定又聽話嘅員工。結果循環繼續，舊一批同事又再一個接一個咁離開。

馬雲曾經分享過一個管理心法：「好耐以前，有一個女幹部，人超好，但招返嚟嘅人都全不靠譜。後嚟經過分析，發現有啲人嘅本能係招比自己弱嘅人，越弱嘅人就越聽話，能夠令呢個人有安全感⋯⋯大公司裡面最容易生長嘅就係白兔，即不幹活嘅好人⋯⋯佢地會為咗維持公司嘅現狀而請弱嘅人，形成惡性循環，好多公司都因此倒閉。」

如果你發現老細有呢種招聘嘅傾向，係時候為自己將來打算一下。