香港股市 將在 7 小時 36 分鐘 開市

【我係邪惡HR】最厭惡的面試手法(HR小薯蓉)

【我係邪惡HR】最厭惡的面試手法(HR小薯蓉)

每個Interviewer都有佢自己嘅面試style, 有啲友善到令人可以暢所欲言,輕輕鬆鬆咁傾計; 有啲就深不可測,你完全估唔到佢鍾唔鍾意你。不過, 有啲interviewer嘅面試手法真係幾令人討厭, 就好似以下呢種。

朋友美奈子最近開始搵工,因為佢本身做開嘅公司規模都比較細,所以佢令次特別想搵啲名氣比較大嘅公司去申請。等咗一排,終於有間公司嘅HR打嚟約佢見工,不過第一次面試見嘅唔係HR,而係佢所屬部門嘅主管。

因為間公司喺行頭都有啲名氣,所以美奈子對份工非常有興趣,面試之前佢真係做足準備。 去到見工當日,雖然好鬼緊張,不過勝在準備充足,都叫做有啲信心,點知一入到房見到個interviewer,咩信心都冇曬。

入到去一坐低,interviewer淨係叫佢介紹下自己, 眼尾都冇望過佢一眼, 成個interview都喺度自己做自己嘢,就連想同佢eye contact都contact唔到。面口一路西,毫無笑容, 成個interview畀到美奈子嘅感覺係不受尊重。 完成咗個interview之後,美奈子覺得自己應該都冇行, 但點知過兩日竟然收到second interview嘅邀請,見完仲有埋offer, 不過最後佢考慮過自己應該同唔到呢啲老細做嘢, 所以最後都拒絕咗。可憐嘅HR又要再從新搵人。

其實interview都係一個畀大家溝通嘅機會,你擺起個款, 人地又點同你溝通呢? 有人話, interview係應該擺個款出嚟測試下求職者嘅抗壓能力, 但作用有幾大真係無從稽考。喺短短面試嘅幾十分鐘內, 頂唔順你都可以扮住頂得順先, 其實你真正認識到呢個人嘅又有幾多?與其係咁, 不如製造一個可以好好溝通嘅氣氛,正正經經同人傾場計。 你識尊重人,人地自然識尊重你,大家將來先可以好好合作, 就係咁簡單顯淺嘅一個道理。