【我係邪惡HR】畀前老細寫衰一定死梗？（HR小薯蓉）

【我係邪惡HR】畀前老細寫衰一定死梗？（HR小薯蓉）

喺老細講：「同朕check下」之前，一般HR都會喺同事入職前做一個Reference check。Reference check嘅仔細程度視乎每間公司嘅要求，有啲可能淨係check工作、有啲就學歷都會check埋，仲有啲可能連信貸紀錄、犯罪紀錄等等證明都要睇。

我地大部份收返嚟嘅Reference check都係正正常常、冇花冇假，最多都係啲年資、日期有輕微出入。比較大單啲嘅就係虛報年資、學歷、人工報大數等等，呢啲涉及誠信問題都需要特別跟進。而關於工作表現嘅回覆偶爾會收到一兩個，一般公司老細都好少會花時間填，通常填得落去嘅一係證明個老細好得閒、一係佢同前下屬嘅關係真係好差，先會唔想大家好嚟好去。

作為打工仔，畀前老細寫衰係好無奈嘅事，呢個係單方面嘅攻擊，先唔好講有冇解釋機會，甚至佢喺你背後同新公司講咗啲咩你都未必知。曾經有網友分享過，因為前老細reference check寫得差而冇咗offer，驚以後都搵唔到工。不過唔好以為一定死梗，唔一定每間公司都一定咁倚賴reference check。

呀May出咗嚟做嘢好幾年，今次過五關斬六將，我地同主管都認為佢係幾適合嘅candidate，但嚟到Reference check最後一關竟然出咗啲事。話說佢嘅前僱主喺reference check上寫咗編文，力數呀May不是。我睇到份嘢嘅第一個感覺係：

「乜咁大仇口呀？」

佢前老細好似想佢呢世都搵唔到工咁。我地收到呢啲Reference check結果一般都會通知部門主管，睇下佢點睇。你可能會以為新僱主收到呢啲咁差嘅評語，呀May今次個offer一定凍過水，不過其實呢個世界都有比較明白事理嘅僱主。

部門主管睇完份嘢話：「佢做之前份工做得唔好唔代表嚟到都做得唔好，我見過佢覺得冇問題。」

我地HR都應該明白辦公室政治有時係可以好險惡，一個人喺一間公司做得好唔好，係受好多因素影響。可能係人夾唔到、可以係工作內容影響、可以係老細嘅領導能力問題。我地至少可以考慮畀人地一個解釋或者check多幾間公司。而求職者亦可以喺CV上面寫埋其他工作上嘅推薦人資料，變咗可以「搵多個人幫你講說話」。

如果每次一見人地reference check寫得差就判人死刑，將心比己，有時可能真係有欠公平。