【我係邪惡HR】老細Cut HR 到底係咩諗法？（HR小薯蓉）

【我係邪惡HR】老細Cut HR 到底係咩諗法？（HR小薯蓉）

最近同朋友食飯，佢講起一個令HR十分無奈嘅故事，作為一個做咗多年HR嘅薯蓉，真係聞者傷心，聽者流淚，心裡面穿咗一個窿。

芝士喺西蘭花公司做HR Manager已經有5年，西蘭花公司係一間外國公司，喺香港嘅員工人數大約有二百幾人。當年班蘭子嚟到西蘭花公司嘅時候，HR都仲稱得上係一個部門，當時HR條team都有4個人。佢帶住條team幾一齊做，招聘、出糧、培訓等HR function都可以照顧到。芝士仲不停為員工爭取福利，喺佢努力下，員工福利好咗、同事做得開心咗，培訓亦都攪多咗。

好景不常，新老細上任話要減資源，呢個時候老細當然要搵地方開刀。老細開刀嘅方向離唔開嗰幾個：

1.重疊資源嘅職位

2.人手過盛嘅地方

3.可有可無嘅職位

4.表現唔好嘅員工

通常呢啲職位去邊度搵？識搵一定係搵後勤支援嘅部門先。支援性質嘅部門代表包括有會計、HR、IT、行政等等。當時西蘭花公司嘅HR應該係被界定為第三種，老細手起刀落就裁咗兩個人。

芝士無辦法，得返兩個人都要做，但過咗冇幾耐，連佢唯一嘅同事都走埋，更慘嘅係老細話唔畀佢再請返人。

芝士心諗，好啦老細，你減剩我一個，我唯有做返一個人做到嘅嘢啦。不過當時嘅芝士太天真喇，當你剩返一個人嘅時候，無論老細定你身邊嘅同事，都expect你要做返4個人嘅效率同工作量出嚟。芝士好無奈，最後只有選擇另謀高就，西蘭花公司連唯一嘅HR都冇埋。

好多公司都有HR呢個部門，但就唔係個個HR都咁受老細重視。喺西蘭花公司嘅老細眼中，HR似乎只需要維持一般請下人、計下數嘅功能，其餘嘅嘢似乎可有可無。因為HR被視為洗錢嘅部門，就算幫公司增加到效率、少咗人走、培訓培到個明日之星出嚟，喺盤數上面根本唔會睇得到。

「人」係公司最大財產可能好多人都識講，但你望下自己公司嘅HR，其實某程度可能反映緊你老細真正嘅想法。