【我係邪惡HR】討厭的HR是如何煉成的？（HR小薯蓉）

我諗大家都成日都聽到網上或身邊有朋友去見工時有過不愉快嘅經歷，又甚至自己親身遇過態度唔好嘅HR。例如HR寸寸貢、態度唔好、全程黑面、明明乜都唔識又自視過高⋯⋯惡行太多不能盡錄。無可否認，有啲HR的確係咁，甚至影響整個行業嘅名聲。每個行業都總有一啲人係負責做壞個朵，好似的士司機咁，成日畀人話冇禮貌、拒載，但其實仲有好多好嘅的士司機。喺HR呢行入面都一樣，我相信好嘅HR總比壞嘅多，至於點解有部份HR會咁討厭，可能係因為⋯⋯

1. 跟錯師父學錯嘢

每個人初出茅廬時，第一份工、第一個老細教嘅嘢影響可以好深遠。正所謂學壞三日，一出嚟做嘢如果跟著個寸嘴老細，好快就培養出錯誤嘅態度。「老細都係咁寸人啦，而家佢嚟求職，有求於我，有咩問題？」罪過罪過，誤人子弟，罪大惡極咪呢啲。

2. 唔係HR嘅HR

做HR係咪一定要讀HR？答案當然唔係。有好多公司，人手未必好夠，HR嘅嘢都係由行政部或秘書兼埋。佢地雖然做緊HR嘅工作，但未必受過HR有關嘅培訓。Interview應該點問問題？咩問題問得？咩唔問得？佢地可能真係未必知，結果問咗啲令人唔舒服、甚至有冒犯性嘅問題。佢哋亦可能唔明白自己一舉一動影響緊公司形象，因此擺出一乎高高在上嘅態度，咁咪好易令人討厭。

3. 畀人激得多

無可否認，有啲求職者見工係比較「騎呢」。有啲行業，HR每個月做嘅interview數量可以係數以百次計。試想下，佢地遇到奇怪求職者嘅機率比一般HR都高。EQ長期受挑戰，要保持正常係需要有返咁上下功力，有時唔覺意走火入魔火遮眼就可能講錯嘢，做出令人厭惡嘅行為。

4. 人嘅問題

知識學校會教，做人態度學校就未必教到你。出嚟做嘢，邊個行業都好，講到尾都係睇你識唔識做人。HR係關於人嘅工作，特別要識得尊重人。老實講句，如果連人都唔識尊重，仲學咩做HR去管理人。