【我係邪惡HR】請用正確的方法辭職,多謝合作(HR小薯蓉)
出咗嚟做嘢就知,Common Sense一啲都唔Common。辭職都一樣,你以為辭職係一件好普通嘅事,但原來好多人都唔係好知點辭職。當決定要辭職時,請留意以下幾點。
1.記得出聲
「色即是空,空即是色,消失即是辭職,辭職即是消失。阿彌陀佛,哈佬吉蒂。」
有啲人以為辭職同消失係同義詞,只要唔再出現就代表自己辭咗職。其實如果你粒聲唔出就咁走咗去,我地真係唔知你係辭咗職定真係喺呢個世界消失咗。好嚟好去都留低封信,或者留個口訊,講聲畀老細知。今日留一線,日後好相見,將來有緣份我地係有機會再見的。
2.要同對的人講
有一次有個同事突然間唔返工,後嚟我地打咗好多次電話先搵到佢。我地問佢做咩唔返工,佢就話佢辭咗職。我地一頭霧水,再問落去先知原來佢辭職冇同老細講,佢同咗隔離個同事講。最慘隔離個同事以為佢講笑,根本冇諗過佢真係要辭職。
又有時有啲同事會拎住封信走嚟HR話自己要辭職,以為辭職唔駛自己開口,淨係要同HR講就得,然後HR會同返佢老細講。Sorry呀,辭職係自己嘅責任,係唔可以假手於人㗎。唔該你拿出勇氣100%,親自面對你自己老細,親自同佢講再見。
3.計清楚幾時last day
計last day對好多人嚟講原來係一條艱深嘅數學題,HR成日都會收到計錯last day嘅辭職信,結果有人可能會攪錯自己個last day。其實算式好簡單,如果你係一個月通知期,一般嚟講last day就會係辭職當日嘅下個月同一日嘅前一日。例如8月5日辭職,last day就係9月4日。但如果你喺一個月最後一日辭職,根據勞工法例,你last day會喺下個月最後一日,例如9月30辭職,last day就係10月31日。當然有啲公司會跟返第一個例子嘅方法計10月29日係last day,詳情就要問返自己公司HR喇。仲有一個情況就係下個月冇同一日,例如1月30日辭職,因為下個月冇30號,所以last day就會計到2月28日或2月29日。