【我係邪惡HR】點解HR總要問到人口啞啞?(HR小薯蓉)
有一次做面試技巧培訓,有一位學生佢本身面試經驗豐富,對做面試嘅HR有咁嘅睇法:「我覺得HR每次做面試嘅目的,就係不停喺你份CV入面搵出你嘅弱點,然後不停集中攻擊,不停問不停問,直到你答唔到為止,攪到你冇曬自信,咁佢就可以篩走你。」
喺佢心目中,HR根本就係一個虐待狂。首先搵出別人嘅傷口,然後喺上面又捽又,再喺傷口上灑鹽,同時暗中享受別人嘅慘叫聲。最後,睇吓邊個頂得最耐死唔去,就可以畀佢成功過關。
如果啲HR真係咁,唔該拉曬佢地去坐監。
相信唔少人都對面試有類似嘅睇法,例如每次好似畀人當罪犯咁盤問,問問下又好似唔信你咁,硬係要寸你兩句,好似問到你口啞啞,令你見唔成份工就係佢嘅目的一樣。
面試官到底係咩心態?
首先我地要了解一下面試官嘅心態,先諗下,你覺得interviewer希望第一個見嘅人就啱心水?定係想虐待N個先搵到啱嘅人?如果你當HR係虐待狂,你會認為係後者,而我覺得後者唔單止係虐待狂,甚至係一個自虐狂。
其實面試嘅目的好簡單,佢只係為咗搵適合嘅人,如果第一個見就啱其實係更開心。真正嘅面試係一件花時間、花心機嘅事,面試官何苦要辛苦自己,刻意虐待你?
咁點解面試官總要問到篤?
其實好簡單,當佢問咗你一條問題,而你嘅答案令佢仍然有疑惑,好自然會令佢想問多幾句。千祈唔好覺得佢有心留難你,或者即刻覺得佢唔鍾意你,咁樣好影響你餘下面試時間嘅自信心。只要你講嘅唔係亂咁吹或者背出嚟嘅標準答案,你係唔會咁容易畀人問到口啞啞的。就住問題,清楚表達你嘅想法就可以,除非你根本冇想法啦,咁又係另一層次嘅問題。其實面試官從來唔想令人口啞啞,因為你啞咗對佢一啲好處都冇。