【我係邪惡HR】2017令人葡萄的員工福利(HR小薯蓉)
今時今日公司要留住員工個心越嚟越困難,除咗錢之外,工作時間、假期日數、交通配套、家庭友善、有冇旅行、有冇早放,樣樣都成為留住員工嘅武器。2017年就快完,今年又有好多公司推出咗啲好多令人葡萄嘅福利,望住啲報導流曬口水,只能慨嘆「這些機會不是屬於我的」,我地一齊回顧下呢年令人十分葡萄嘅葡萄。
世界電腦巨企Microsoft嘅香港分公司,喺今年春季就公佈咗一系列嘅家庭友善政策。大肚媽媽辛苦係人都知,但香港法例規定嘅產假只有10個星期,比日本嘅14星期、新加坡嘅16星期都少。Microsoft 就一次過將產假加一倍到20星期。爸爸嘅侍產假就一次過由3日加到6個星期。如果家人有病仲可以有最多4星期嘅有薪假,畀員工照顧屋企人。呢一系列嘅家庭友善政策都令打工仔十分葡萄。
而家人人都鍾意去旅行,人人都唔夠年假用,年假你而家又有幾多日?恆生銀行早前就公佈咗個消息,為咗增強企業競爭力,由2018年起6成員工可以加假4日,員工因職位而定,可以享有18至30日年假。除左年假,恆生銀行仲有好多其他特別嘅假期,例如生日假、考試假、14星期產假、10日侍產假等等,這些葡萄很想要吧。
生BB有產假、侍產假,估唔到孫仔出世,新任爺爺嫲嫲、公公婆婆都可以有假放。唔能夠唔佩服香港寬頻嘅創意,今年佢地就為員工推出咗3天添孫假,提供三代合照一張就可以申請。一向福利好嘅香港寬頻,仲有好多令人葡萄嘅福利,例如每個月一個星期五放半日、重要節日前放半日、入職週年紀念假、16星期產假、14日侍產假等等。聽完係咪即刻想睇下香港寬頻有冇請人?
雖然以上嘅公司都係資源多嘅大型企業,但無疑員工工作生活平衡係現時人力資源管理嘅一個重要課題。今日要留住員工除左講金,仲要講心、講葡萄,如公司十年如一日,要留住人才或吸引新一代就更加困難,各位HR同行準備好未?