【我係邪惡HR】4件暑期實習要留意的事（HR小薯蓉）

【我係邪惡HR】4件暑期實習要留意的事（HR小薯蓉）

執筆之時天氣去到34度高溫，諗起即將喺炎炎夏日開始做實習嘅暑期實習生。一般暑期實習會喺6月左右開始，做大約兩至三個月，因為係實習性質，人工唔會太高，有啲學生寧願出去做份Part-time Sales，分分鐘人工都高過做實習。不過，實習始終同part time唔同，實習嘅目的唔應該只係為搵錢，最重要係得到有價值嘅經驗，為將來投身社會做足準備。

1.搵工有法

要搵一份暑期唔算太難，如果你由年頭已經有開始留意，應該會發現唔少機會。就算到咗5月，其實仲有好多HR努力請緊人，仲有興趣做暑期實習嘅不妨主動問問自己學校嘅Student Centre。另外，無論你係外國留學生定為係本地學生，除咗上一般求職平台搵實習之外，不妨試下將自己嘅履歷寄去心儀嘅公司，如果咁啱佢地都搵緊暑期實習生，話唔定會得到一個面試機會。

2.搵份同將來目標相關嘅實習

好多人會為實習而實習，但最理想嘅情況係諗清楚自己需要咩經驗，然後去選擇適合嘅實習機會。我見過有啲學生對自己嘅需要好清晰，上一個暑期吸收咗A方面嘅經驗，今年暑假就去可以吸收B經驗嘅地方。到佢地畢業搵工嘅時候自然可以快人一步，理想達到。

3.工作簡單都唔好睇少

每間公司資源都有限，人手都可能有不足嘅情況，亦可能會因為呢個原因而請暑期實習「幫幫拖」。先唔好理佢因咩原因請，暑期實習最重要係有嘢學，當然最好嘅情況係你份暑期實習係真•實習，有曬成個training programme嗰種。但唔代表其他為咗應付人手短缺嘅公司冇嘢學，就算做Filing嘅，都可以喺文件堆中發現寶藏，得到好多行內嘅資訊。當然，如果真係做幾個月Filing係會人都癲，或者邊做邊搵過份更有價值㗎啦。

4.識多啲人

好多人諗住做完實習，要個公司名寫喺CV就夠喇。但做暑期實習唔係淨係要個名，除咗要學到嘢之外，更重要就係識多啲人，早早擴闊自己嘅人際網絡，咁可能對你將來嘅工作有好大幫助。