【我係邪惡HR】5個收辭職信須知（HR小薯蓉）

【我係邪惡HR】5個收辭職信須知（HR小薯蓉）

上次講完遞辭職信須知，今次講下收辭職信須知。遞辭職信唔係人人識，但原來收辭職信亦都一樣。做細嘅時候唔需要擔心呢個問題，但當你有一日成為人地老細，你就要留意收下屬辭職信應該點做。

1.別太執著原因

當收到辭職信，你可能會諗，係唔係佢唔鍾意我？係唔係我有地方做得唔好？到底佢因為咩原因而走？好多主管都會想搵出下屬離職嘅原因，但答案通常都會係：「唔係公司問題，唔係你問題，只係我想有其他發展」無論你點問，你都未必會搵到真正原因。

日本一間人力銀行做咗一個調查，發現員工真正辭職嘅理由第一位係「唔喜歡上司同公司嘅經營方式」。而同老細講嘅辭職理由第一位係「想去進修」。呢個調查嘅結論，其實用一句廣東話演繹最傳神：「話你戇X怕你嬲」。所以對於辭職原因，太認真你就輸了。

2.冇得唔畀人辭職

有啲主管收到辭職信嘅反應好大，好似接受唔到現實咁。有次同事辭職，但主管堅持無論如何都唔會收佢封信。留意返，無論你接唔接受，通知期由佢辭職嗰日已經開始計算。同事只要畀足離職通知期就可以離開，不如接受現實早啲開始搵人啦。

3.唔係叫人走就可以即刻走

有一種主管同上一種主管相反，佢地恨不得員工即刻走：「好啦，我唔會畀嘢你做，你聽日唔好返工喇。」其實如果我地要員工提早離職，公司係要根據僱傭合約賠足代通知金的。唔係你話叫佢走就可以走，請問一問HR先。

4.避免留難

正所謂今日留一線日後好相見，呢句唔係淨係適用於下屬，亦都適用於老細。有啲情況係大家一直合作良好，但到辭職關係先破裂。其實大家永遠唔知邊一日有機會再合作，而且你都應該唔想人地走咗都唱衰你間公司㗎。

5.記得出聲

好多人都話，收到信先留人通常已經太遲。有上司會喺呢個moment先出招留人，可以加人工嘅加人工，可以升職嘅升職，冇budget嘅就動之以情。結果keep住封信到辭職前先交畀HR，有啲甚至個人走咗都唔通知HR。同事辭職HR要埋數、要取消自動轉帳出糧，請謹記及早通知HR。謝謝！