香港股市 已收市

【我係邪惡HR】HR旺季降臨(HR小薯蓉)

【我係邪惡HR】HR旺季降臨(HR小薯蓉)

新一年祝大家新年快樂,狗年順順利利搵多啲!講到搵多啲, 好多人過咗年都會積極考慮轉工,唔係因為新年新開始, 而係因為好多公司會喺一月或農歷新年前出花紅, 大家都等花紅袋袋平安後先遞信辭職。正所謂魚唔過塘唔會肥, 大家都希望可以主動出擊加人工, 而呢種傳統亦令HR過年後特別旺。 如果要幫HR畫一條旺淡分界線, 通常都係過年前後。

大量辭職信

對部分HR嚟講,過年嘅幾日假期絕對係要好好享受, 因為過年後迎接佢地嘅係每年都會發嘅一場噩夢。正如前文所講, 好多同事會喺收到花紅後另謀高就, 過年後每日都收到辭職信係等聞事, 而辭職信嘅數量多寡取直接反映出同事們對加薪幅度同花紅嘅滿意程 度。第一批辭職嘅通常都係充滿勇氣裸辭嘅同事, 佢地忍咗咁耐都係等呢日。第二批辭職信會緊接而來, 由於市場多咗空缺,搵工都會比較易, 過年後開始搵工嘅朋友都會陸續辭職。

不停登廣告請人

HR呢頭忙完離職同事嘅Final payment,嗰頭又要開始登廣告請人。 雖然香港有好多唔同嘅招聘渠道,招聘網站一籮籮, 不過大部分香港人習慣用嘅似終都係嗰兩三個。 唔好以為登個廣告喺呢兩三個比較出名嘅網站就一定請到人, 好多時由於市場空缺多、競爭比較大, 過幾日收唔到足夠CV又可能要再登過廣告。

應付追魂call

喺HR努力應付緊辭職信嘅同事,由於有啲部門辭職人數比較多, 人手不足嘅情況比較嚴重,HR都要優先處理。 不過有啲部門就算走一個人都會日日打電話嚟追HR要人, 啲奪命煩音每日都挑戰緊HR嘅底線, 為繁忙嘅工作增添一點負能量。

HR都會辭職

要應付大量辭職信、奪命追魂call唔緊要, 但唔好唔記得HR都會有人辭職的。 最差嘅情況係喺你最忙嘅呢段日子,你隔離位、 又甚至係你老細都提出請辭,咁睇嚟都係時候要為自己打算一下。