香港股市 將在 8 分鐘 開市

【我係邪惡HR】HR的3隻大鑊(HR小薯蓉)

HR的3隻大鑊

出嚟做嘢小心謹慎係必然,不過人唔係機械,難免會有犯錯嘅時候。犯錯都有分大細,犯細錯都有機會補鑊,但如果係大鑊嘢,就只能祈求天父做十分鐘好人,叫老細憐憫你呢個罪人。以下幾種錯對HR嚟講係「好大鑊」,就算最後天父肯做好人,老細都未必會放過你。

1. 計多咗糧畀人

做HR最辛苦就係負責計糧嘅C&B(Compensation & Benifits) 同事,計錯一條數都可能係死罪。例如計Final payment咁,計完出多咗糧畀離職同事,如果好彩嘅話個同事都話肯賠返,但如果唔好彩,個同事收錢後就化成一片雲彩再搵唔返。出多咗嘅糧就好似潑出去嘅水一樣追唔返,如果條數好大,老細問責落嚟,睇怕都要有孭鑊上大帽山請罪嘅準備。

2. 犯咗法都唔知

HR要熟悉唔少條例,勞工法例、稅務條例、歧視條例、私隱條例、入境條例、MPF等等,一個盡責嘅HR就要確保公司唔好犯法。例如請人要識得睇簽證,邊啲人請得邊啲人唔請得,冇睇清楚隨時請咗非法勞工。其他條例都一樣,冇跟足隨時令公司惹官非。如果犯咗法都唔知,老細會喺解決官非之前解決咗你先。

3. 洩漏個人資料出街

眾所周知,人力資源部存放咗全公司同事嘅個人資料。呢啲個人資料全部都係高度機密,只有HR嘅同事可以隨時查閱,其中最敏感嘅就係薪酬資料。呢啲資料要好似國防部機密一樣咁看待,如果有人唔覺意洩漏咗出去隨時會引發世界大戰。HR喺個位做嘢都要特別小心,有可疑嘅陌生人逼近就要即刻收埋啲機密資料;出E-mail就更加唔可以大意,一個唔覺意將啲人工資料send咗畀第二個唔應該知嘅人,唯有入房同老細自首:「命就有一條,你攞去啦。」