【我係邪惡HR】Turnover的隱藏成本（下）（HR小薯蓉）

【我係邪惡HR】Turnover的隱藏成本（下）（HR小薯蓉）

請人嘅成本有部份係隱藏起嚟，表面上數字係睇唔到。如果明白請人嘅隱藏成本，就會知道留住好員工嘅重要性，往往呢一點就係成功企業同平庸企業嘅分界線。

1.專業知識被帶走

一個打工仔最大嘅價值係佢嘅知識同技能，只要知識技能越強，價值就越大，就越唔怕搵唔到工。當一個熟手員工走，重新招聘同培訓嘅成本唔細，仲有因為新人未夠經驗可能會得罪客人，從而影響公司形象。公司要留住嘅除咗係員工個人，更要留住佢熟手嘅技能；要留住員工嘅技能，就要先留住佢個心。員工關係就好似男女關係一樣，留住個人更要留住個心，所以以心待人，往往係好多成功管理人嘅管理心法。

2.士氣受影響

如果你有一啲年資較長嘅同事離職，佢喺公司團隊入面已經建立咗一定地位同關係。佢嘅離職，唔多唔少一定會影響到其他同事。「佢做咗咁耐點解突然走？」「無咗佢點算？」「以後啲嘢邊個做？」「吓？唔識可以問邊個呀？」同佢相熟嘅同事又會因為咁而唔開心、團隊注意力被分散，工作流程要重新安排，士氣受影響，公司嘅Target又會慢一步。

3.管理層Focus錯曬

當你有人走，自然要重新請人。負責請人嘅除咗HR之外，仲一定會牽涉到部門管理層。當一個部門嘅Turnover高，主管就要花更多時間喺請人上面。當主管要額外花時間喺招聘上，佢自然會少咗時間做決策。結果Focus錯曬，一係做錯決定、一係冇時間去創新，甚至係冇時間去認真做管理。

當一間公司留唔住人才，佢只有不停請唔介意捱嘅Fresh Grad.補充，當佢地有返咁上下經驗，結果佢地又會走，最終陷入惡性循環。其實加多幾個%人工，留住好員工，好過你費時失事重新請人。呢啲請人嘅隱藏成本，用計數機死篤爛篤都係唔會計到個數字出嚟，只有腦細決定信定唔信。不過都係嗰句，呢啲成本天知地知你知我知，最怕只係腦細扮唔知⋯⋯