【柏傲莊III收票王】拆解瘋狂入票真相!真係人人瞓身搶?
香港樓市火爆,一個山頂車位已賣過千萬,震驚全球,令周六開賣的大圍站上蓋「柏傲莊III」火上加油,已正式成為97後新收票王,但當中有無水份?
下載Yahoo財經APP
美股、外匯、加密貨幣免費即時報價,自選投資組合獲取相關新聞提示。
新世界發展及港鐵合作發展的柏傲莊項目,愈賣愈貴,III期首張價單折實平均呎價19,999元,較去年推出1期貴約6%,而III期第二張價單折實平均呎價逾2.1萬元,較首張價單再貴6.9%。一房入場費要754萬,貴與平見仁見智,真係視乎閣下財力。
話說回來,據悉「柏傲莊III」截收逾2.7萬票,打破「柏傲莊I」收票數字(即2.27萬),成為97後「收票王」。未能打破97年收票最多的青衣「灝景灣」紀錄,收過3萬票,但一場97金融風暴被揶揄叫「浩劫灣」。
既然價錢愈來愈唔再大眾化,為何收飛強勁?其實發展商銷售部署愈來愈高明,以擠牙膏方式,一步一步出貨,營造超購及萬人空巷效果。
最明顯就是在收票數字上「做功夫」。根據銷售安排,「柏傲莊III」大致分三組收票A1、A2、B組,A1組係大手買家,優先認購最貴單位,最少買2伙,最多大手買4伙;A2組最多買2伙,而B組係一般買家,都是最多買2伙。
任何人可以入晒三組飛,而A1組能入一票、A2組能入一票、B組必須入兩票。加上如果曾經抽過「柏傲莊」I、II期人士,可以額外於每組多入一票。換言之即係一人最多可以入7票。理論上,最極端情況是將收票量除以7(當然無可能發生吧),即只有約2,900多人認購,可粗略估計當中有多少水份。
相比當年I期的收票情況,I期只限每人每組一票,即最多1人3票,至今倍增到1人7票,司馬昭之心吧。結果係,今日截收逾2.7萬票,其中60%係所謂「柏傲莊粉絲」,料有不少水份。
由於首輪推售只有331伙,數量不多,而整體III期共有892伙,約佔逾三分一,在傳媒及廣告宣傳配合下,谷大超購數字其實唔難。
所以,即使樓市氣氛旺,但買新樓入市時,都唔好被氣氛沖昏頭腦,奉勸一句保持冷靜。