雅虎香港財經 【樓市專題】策劃「退休屋」三大考慮
香港地雖然人人怨上車難，但不少早年上車、五十多歲上班族已完成供樓大業。對這班幸運兒而言，關於磚頭的煩惱係應否換樓迎接退休生活，關於此課程，可以從三大方向去考慮。
原區換樓
住慣某個區，總會擔憂搬去另一區的適應問題。因此不少退休人士換樓，都會優先考慮在原區換樓。
可能你會疑問，既然唔打算搬區，何解又要換樓？退休後即使有一份兼職，難免都要用老本幫補生活開支，所以在置業上，亦要認真考慮自住物業潛藏消耗老本的風險。
例如你現在自住物業係單棟樓，雖然位置就腳但伙數唔多，並要由業主立案法團處理管理、維修事宜，你就可能要考慮原區換樓了。有不少單棟樓銀髮族業主分享個人經驗，大廈大維修固然每戶要分擔更「甘」的維修費，豈料維修完成後，因為物業位置就腳，唔少鄰居把握大廈翻新優勢，索性把自住樓出租，搬去與仔女同住。結果整棟大廈變成租客主導，法團因為無人接莊，大廈管理淪為無人駕駛，遇上較嚴重的維修或清潔難題都無人跟進。
要提防此風險又唔想轉區居住，應對策略係在準退休階段啟動原區換樓行動。揀樓原則係同區的中型或大型屋苑，因為伙數多，理論上每戶攤分的維修費用會較少，而且屋苑法團通常有一定盈餘，足以應付中、小型維修工程。此外，中型或大型屋苑管理公司會投入更多人力資源，不會像單棟樓般一名管理員要身兼多職，當物業有問題時亦較容易獲得專業的支援。
當然過去即使中型或大型屋苑，進行大維修時都曾出現天價維修風波。幸好現在資訊發達，透過網絡或社交平台，你很容易就「八」到目標屋苑法團及管理公司的作風，又或是否已完成大翻新工程。入手已翻新的屋苑物業，未來一段長時間亦不用擔心維修工程會蠶食退休老本了。
細屋換大屋
退休人士都想多一個錢傍身，正常都不敢奢望細屋換大屋。不過還有一個頗受退休人士的換樓方法，可以實現細屋換大屋兼享受寧靜生活的夢想，便是由市區樓換入新界村屋。
隨著樓市調整，新界西村屋易手價已回落至四百萬甚至三百多萬有交易，由市區樓換入新界鄉郊村屋，一來一回更可以多一筆錢充實退休資本，聽起來似乎頗吸引。
假如你都嚮往退休後搬到村屋實現田園生活，你必須考慮鄉郊村屋生活配套未必適合年長人士的問題。首先係交通，鄉郊村屋通常都要駁巴士、小巴才出到「城」，雖然住得村屋，唔少人都會選擇自駕，但如果屋企只有你自己懂得揸車，當你病到腳軟的時候，就難免要領略駁車出城的不便。甚至後來因為年紀大手腳不靈活被迫要放棄揸車，到時駁車出城就成為生活一部分，最終又可能要賣樓搬回市區。
村屋另一大問題係要行樓梯，即使係有氣有力年輕人，日日上落幾層樓梯都會感到吃力，更何況係銀髮族。當然最簡單的應對方案係村屋地下單位，不過有唔少過來人都坦言，村屋地下單位每年春季濕度奇高，老人家風濕發作周身痛係等閒事，另一危機係地板濕且滑，不慎滑跌便手尾長了。
大換細要識「斷捨離」
近年上車與買細單位幾乎劃上等號，不過有唔少五、六十歲上班族擁有七、八百呎自住物業，對這班業主來說，由大屋換入細單位作「退休屋」，是否自降身價搵來搞？
諗大換細，最基本條件係睇現時的自住大單位有幾多人住。昔日換大單位，原因離不開屋企有小朋友，現在子女離家自立甚至移民，大單位餘下兩人自住，便有條件換到適合二人的細單位。
對退休生活而言，大換細有三大好處。一是清掃地方變得簡單，而且地方有限可以迫自己學習「斷捨離」。須知道囤積雜物係銀髮族最常見的壞習慣之一，及早學習精簡式儲物法，就不會令自己陷入被雜物包圍的退休生活困境，。
二是可以趁換樓入手設有適合長者生活配套的細單位，例如儲物空間較集中、設有電磁爐的廚櫃組合，令長者用家更方便及安全地煮食，又或設有企缸及防滑物料的浴室，只要加裝扶手及設有暖風功能抽風機，即可以切合長者淋浴的需要。
三是大換細賺差價，可以變相套現部分資金。令不太想申請安老按揭的業主，都可以利用物業套現充實退休資本。
筍盤推介
屯門
出售單位：開放式低層
售價：460萬元
面積 / 呎價：319呎 / 14420元
賣點：區內樓齡較新豪宅盤，毗連著名國際學校。
出售單位：兩房兩廳單位
售價：500萬元
面積 / 呎價：589呎 / 8489元
賣點：新淨裝修，高層可享開揚風景。
出售單位：兩房兩廳單位
售價：650萬元
面積 / 呎價：549呎 / 11840元
賣點：單位可享翠綠景致，連車位方便自駕出入。
沙田
出售單位：一房兩廳高層
售價：450萬元
面積 / 呎價：295呎 / 15254元
賣點：毗連城門河畔，乘搭馬鐵可往返大圍及石門工貿區。
出售單位：兩房一廳中層
售價：445萬元
面積 / 呎價：269呎 / 16543元
賣點：單位可享城門河景，屋苑交通、休閒配套完備。
出售單位：一房一廳
售價：450萬元
面積 / 呎價：274呎 / 16423元
賣點：位處沙田市中心，毗連新城市廣場，盡享購物消閒優勢。
