雅虎香港財經 【樓市羸家】車位炒上六百萬之謎（徐峰）
以前老一輩人教落，細價物業價格快上快落升幅大，最好炒，所以好多上車盤除了是上車樂園之外，亦都是炒家樂園，而售價相對較低的車位，亦是炒家鍾情的物業，除升幅大之外，亦勝在不用付辣稅，不過，在樓市狂潮下，這兩類物業的價格已達到瘋癲程度，到底仲有無得再升？
講緊都是在過去一個星期內發生的事。以往窮等人家要上車，除了得寶花園、荃灣中心之外，沙田第一城絕對是不二之選，全因屋苑提供大量細兩房單位，面積細細，間隔好好用，不過，就在上個周末，一個實用面積284呎的細單位，就以超過580萬賣出，實用呎價超過兩萬元，打破屋苑入伙37年的歷史高位。
其實呎價兩萬可以買到咩？大把貨畀你揀，講市區，佐敦的港景峰有一個實用面積546呎的2座高層單位，上個月賣1200萬，呎價唔使2萬2，比沙田第一城貴唔夠一成。新界區呢？依家賣緊的嘉熙，雖然位置吊腳少少，但勝在環境好，近科學園又近海，仲可以踩單車，上星期首批呎價都是一萬六千幾，五百幾萬已經有個一房，面積仲有成三百三十幾呎，比沙田第一城兩房單位大成五十呎，分分鐘等如一個房。
不要以為只是細價住宅物業升幅瘋狂，以往一直以價細好炒見稱的車位，已經炒到一個不可思議的地步。好似今個星期初，何文田豪宅新盤天鑄的一個車位，就炒到上600萬大元，成為全港車位王，睇返田土廳紀錄，呢個車位原來在去年7月中以340萬元買入，持貨幾個月已賺260萬元或七成幾。
其實點解一個車位可以賣到成600萬？睇返天鑄的資料，1、2期加埋有527個單位，而車位就有370個，照比例計都唔算太少，唔使兩伙就可以分到一個車位，奈何天鑄是豪宅盤，全數單位最細都有八百幾呎，仲要主打三、四房大戶，咁好明顯，住戶非富則貴，相信唔少住戶一家人都唔只得一部車，而且大部份都係貴車，又點可以泊出街咁失威呢？所以咪做就了一個車位王的誕生囉。
=============================================
