【樓市贏家】一開售賣過千伙 康城Malibu熱爆之謎(徐峰)
農曆年後新盤繼續熱銷,並以會德豐Malibu最矚目,短短8日勁賣過千伙,到底有何原因?
有留意筆者專欄的讀者,應該都會記得,早前筆者跟大家分享過,日出康城區內現時配套不足,想醫肚都無乜選擇,但Malibu開賣仍然賣個滿堂紅,首推前勁收近萬票,而發展商亦積極加推,頭四輪推出的1070個單位均即日清袋,雖然其後有一伙撻訂,但亦是市場神話,甚至可說是會德豐史上賣得最好的樓盤。
賣得咁好,說到底都是價錢問題。參考項目推出的單位,首張價單折實均價大約14500左右,在康城區內來說,並不算特別平,但若對比將軍澳其他位置新盤或剛收樓的二手盤,好似天晉系列、Malibu同系的Savannah等等,現時二手呎價動輒萬七八,就連將軍澳中心等樓齡較高的二手屋苑,呎價都要萬六七,Malibu售價似乎有一定折讓。
雖然心水清的你,明顯知道,日出康城雖位處將軍澳,但無論是交通、周邊設施,都無可能與將軍澳南直接相比,更有人話,日出康城係市區中的郊區。
但點解大家都會咁樣比較呢?咁就要多得新地了。還記得舊年年底新地推售晉海,未開賣發展商已經不斷地把晉海跟同系天晉系列相題並論,跟住到宣傳片一出,嘩!唔講真係唔知個盤喺日出康城,成條片七成都係影緊天晉或將軍澳南,好明顯係把日出康城當澳南咁打,情況就好似把Park yoho當正Grand yoho咁賣,但洗腦式宣傳下,又真係賣得,成功把日出康城重新包裝。
但今次Malibu咁賣得,另一個原因就是,樓盤位於一個不死地區,所說的不死不是對買家而言,而是對發展商而言,即是話,當某一區有樓盤開賣,只要發展商開價唔太狼死,都一定賣得好,大家睇下近幾年將軍澳推出的新盤,雖然計埋都有十幾個咁多,但除了有一個又封盤又狂加價之外,大部份都賣個滿堂紅。
============================================