【樓市贏家】二揀一 住絕世黑仔屋定瞓街？（徐峰）

年尾流流相信唔少人都會去睇下流年睇下風水之類，講起風水這東西，好多人都會話迷信，但中國人累積幾千年下來的學問，唔少人都篤信不疑。不過，在現今的香港，樓價飛升到一個嚇人的高位，又想風水好又要價錢啱，只怕可遇不可求，買得起，但風水差到極，你又會唔會考慮？

早排筆者聽到有個case，是來自一個認識多年的阿姨，有日同筆者飲茶就講，俾佢老公激到生蝦咁跳，事緣係兩位老人家十多年前賣出自住物業之後，一直租住在阿姨細佬名下的物業，因為是先人的遺產，所以一直都不用交租，但條件就是，若果要賣樓，阿姨兩公婆就要搬走。

到早幾年，兩老的仔女都已出身，於是便去申請公屋，其實故事來到這裡，都沒有問題，但原來這位Uncle是一個宗教狂熱份子，日日在家求神拜佛不止，還十分相信風水，每隔一年半載就要大執屋企傢私位置，Uncle就同阿姨講，如果排到公屋，一定要搵師傅睇過風水，師傅話唔得，點都唔會住。阿姨即時嬲到頭頂出煙！大鬧佢老公：霸咗細佬間屋咁耐，都要還啦，有屋你就搬啦，仲要睇風水？定你想瞓街？

筆者聽完之後，其實都唔係好明，如果風水唔好就唔住，呢個世界到底有幾多人要瞓街呢？如果間間屋都風水好，咁要風水師來幹嗎？風水師不是要幫人改善風水嗎？（小弟真的對風水無認識，歡迎賜教）不過，始終這是人家的家事，筆者都沒有加太多意見，只可以叫阿姨睇開點。

其實在現今的香港，可謂一樓難求，特別是資金有限的上車人士，所以大家不時在報章上都會見到，現時買兇宅的人，已經不再限於收租客或外籍人士，只要價錢夠平，都有唔少人會買來自住，始終怕瞓街的人多過怕鬼的人！