香港股市 已收市

【樓市贏家】人生勝利組的抉擇 買唔買居住中的公屋單位?(徐峰)

還記得小時候筆者已住在私人屋苑,當時有一對住在公屋的表兄弟,仍就讀初中的表哥發脾氣時曾向佢媽媽講了一句:點解我哋要住公屋?當年住公屋始終被睇低一線,揀女婿都唔會揀屋邨仔。但到依家樓市升到人都癲,相信唔少人都會覺得,住屋邨才是真正大贏家。

住公屋的好處,除了是以每月千幾二千蚊的租金,便可以租住一個大小合適的單位,比起現時市場上好多一百呎都無的劏房月租動不動六、七千,已經平一大截,生活環境更好唔知幾多倍。最最最重要的就是,你大可以用市價十份一的價錢,購入一個單位,加埋獨有的按揭條款,幾萬蚊首期已經可以上車,幾年後賣樓,升幅絕對跑贏大市。

係啊!係十分一!你無睇錯!近排筆者又收到一位朋友問意見,話本身住緊將軍澳一個公屋單位,唔知買唔買好,於是筆者八卦上網望下大約賣幾錢啦,發覺佢住開幢樓,過去一年都有幾個一手成交,同樣都是大約340呎的單位,去年1月50萬唔使,到最近日大約57萬左右,升幅大約一成半,跟大市差不多,但除開實用呎價都只係約千六蚊左右。

對比同區的二手私樓,如果以同一個港鐵站、樓齡約廿年的私樓,現時平均實用呎價大約一萬五千幾,如果過兩個站、樓齡三、四年的新樓,呎價要去到萬八、九,雖然你可以話兩者質素差好遠,又無會所,但呎價相差九成,你仲想點!仲有,你睇近排的二手公屋售價,已經貴到飛起,好似上述講的屋邨,同樣面積未補地價都要成200萬,即是你買入單位帳面已即賺幾倍。

其實筆者身邊都有幾位公屋住戶朋友,一早已經買下所住單位,其實原因都有好幾種,比較常見的,例如公屋二代搵錢都唔少,但又唔足以買私樓,為免被富戶政策趕走,索性買起個單位,亦有朋友本身人口比較多,三代總共六、七個人住一間大公屋單位,但隨著時間的過去,家中長者陸續過身,兄弟姊妹亦都結婚搬出,為免被政策踢走要大屋搬細屋,於是便買入單位。不過,唔理任何原因,個人覺得,如果有條件買入,唔好理個單位是否好殘,用優惠價買入,幾年後以市價賣出已可賺一大筆。若我有這個購買權,我想也不用想會即刻買。

=============================================

中小型代理行大匯集 Yahoo!搜尋器筍盤最多最齊