【樓市贏家】今日有樓 一定唔賣（徐峰）

相信所有做地產相關行業的人，都會比人問：買唔買樓好？個市幾時跌？不過近期聽得比較多的，反而是一班有樓人士問；賣唔賣樓好？到底賣唔賣樓好？幾視乎你咩心態，不過筆者就會覺得，現時雖然唔係買樓時機，但同時都唔係賣樓好時機。

點解會有人問賣唔賣樓好？主要都係因為有人覺得樓價升到咁上下，希望趁高位獲利走人，然後等跌再入市，以賺取差價。而為何筆者會認為現時不是賣樓良機呢？

首先，若果你只持有一個單位自住，賣樓後就需要租樓，假設你賣樓後租返層2萬幾蚊租的單位，即是説，一年就要交二十幾三十萬租，兩年高要成五、六十萬，如果你賣樓賺得二百幾萬，交租已經無一大截，仲要大前題是兩年後樓價要跌到你心目中的價位，萬一樓價仍未跌到你心水位，可能還要一直交租，隨時你賺的錢最終就是用來交租。其實，不是都會聽到好多人，就是早幾年政府不斷岀招時，以為樓價會跌，先落車等機會再上車，誰不知樓價不斷升，事主後悔落錯車然後再高追入市。

而假如，你現時是持有多過一個單位，一個自住，其他收租，又如何呢？同樣一句説話，不宜賣樓。

好簡單，大家都知，早幾年政府先後推出多項樓市措施，只要業主手持一個單位，再買其他或一要付樓價15%印花稅，雖然是上屆政府推出的政策，但相信政府短期內都不會減辣，即是話，如果你現時賣出手頭上持有作為收租的單位，將來再買入另外一個單位，先要付樓價15%作為印花稅，連同一買一賣的代理佣金、律師費等，樓價至少要跌兩成，這個動作才會變得有意義，雖說樓價可升可跌，但會否跌超過兩成，還是值得考慮。

不過，假如你持有的單位，是位於那些蝕讓屢屢的屋苑，例如那幾個位於新界區的屋苑式洋房，又或是某幾個位位豪宅區附近的大型假豪宅屋苑，現時都可以考慮下賣樓，始終某些屋苑都是輸少當贏。