【樓市贏家】住得遠但平VS住市區但貴 點揀?(徐峰)
筆者入行咁多年,身邊好多朋友無論租樓、買樓、賣樓等等,都會打來問吓意見,咁筆者一般都會講幾句,心情好仲會詳細解答,不過呢,近排有位朋友就租樓問題打來問意見,筆者都唔知點答佢好。
是咁的,這位朋友本身同女朋友租緊旺角一個細單位住,租金好抵,一房唔使一萬銀,不過,佢就聽隔離屋講(同一個業主),今年年頭加租加超過兩成,由九千幾加到萬二,朋友當然好擔心,講真,呢個社會真係好多月光族,如果真係加二千幾蚊租,都幾大壓力吓。
於是乎,阿女朋友就好擔心,有次同屋企人傾計時講起呢件事,原意都係發洩吓,都無打算有咩回音。點知過咗幾個星期,女朋友個爸爸忽然間問佢幾錢租,幾時到期等等問題,仲話喺荃灣山上面一個屋苑有個三百幾呎單位可以租俾佢,話住喺老豆嘅單位唔怕加租。
返到屋企兩小口子商量咗好耐都唔知點好,一方面兩人都喺港島返工,住旺角有巴士直達,半個鐘多少少就返到,但如果搬去荃灣,要搭三程車,車錢多一倍,一日仲要用多一粒鐘搭車。另外旺角要乜有乜,食嘅買嘅大把選擇,但荃灣個單位因為在山上,只會有少量生活配套提供,方便程度根本無得比。
而重點當然係租金,以荃灣個單位市值租金計,應該就同旺角個單位加租後差不多,但兩年後旺角個單位必定會再加租,之後就係每兩年加一次租,而uncle個單位呢,雖然現時口講話唔使怕加租,但係唔係真係唔加?無人知,又或者可以幾耐唔加呢?又講唔埋,但係小數怕長計,如果幾年唔加租都真係慳唔少。
另外就係單位狀況,雖然兩邊都係三十幾年樓,朋友現時住緊個單位係幾好,但就位於頂樓,好天時間屋熱到飛起,落大雨又怕漏水,天花位已經有些少裂痕;而荃灣個單位,雖然都舊舊地,但屋苑早幾年做完翻新,都唔錯,加上係自己人嘅物業,有咩維修都好辦事。朋友問筆者,平衡以上各樣優點決點,應該搬定唔搬,但今次筆者真係唔知點俾意見,大家又點睇呢?
=============================================