香港股市 已收市

【樓市贏家】供貴樓兼無啖好食 將軍澳的全面地產霸權(徐峰)

大部份人買樓,會睇地點、樓價、景觀、質素等等,但其實,周邊配套亦是一個非常重要的因素,有時前景無限的高檔新發展區,都不如傳統住宅老區的配套來得方便實際。

好似近幾年先後有多個樓盤推出的日出康城為例,當初發展商稱為另一個太古城,又跨海大橋又乜又物,講到有幾威幾勁咁,不過最貼身的配套呢,又似乎無乜。

連埋最新入伙的緻藍天,大大話話都有大約7000至8000戶人住,還未計附近的峻瀅,但只要上 openrice睇睇,原來到目前為止,日出康城只有幾間餐廳咁大把,連最基本醫肚都未做到,前景嘅嘢,還是過幾年先講吧。

當然,已由會德豐投得的第7期,的確設有一個大型商場,有成48萬呎,最快仲會喺2020年左右落成,到時相信都會有唔少食肆。

不過,呢期賣緊嘅Malibu都係差不多時間入伙,估計今年內有機會開賣嘅8期(長實發展)同6期(南豐發展)入伙時間都相若,同埋舊年開賣、2019年入伙嘅晉海,夾埋又有成8000幾伙,連同未來推出嘅項目,整個康城有超過25000個單位,如果平均每個單位住四個人,即係有超過10萬個人住,到時隨時迫爆成個商場。

或者你會話,真係個個都要出街食飯咩?無人煮飯咩?

只要你過一過將軍澳站睇睇,就會發現情況有幾恐怖,將軍澳站一帶近年有成10個盤開賣,雖然至今仍未完全入伙,而附近亦有幾個大大小小商場,但每逢星期六日或者假日,所有食肆都大排長龍,星期日想飲茶等三、四百個籌只係閒事,如果夜晚想落街食飯,麻煩6點前好齊人去到餐廳坐低,否則最少都要等返兩個鐘,成個區好似無人識煮飯咁。

另一個重點係,雖然呢區樓價唔平,大部份住戶都係中產,但難道餐餐出街都想食貴嘢嗎?但奈何區內商場都行中高檔路線,求其食餐都百幾二百一個人,都幾難揾到間快餐店,有口痕友話,啲錢都拎曬去供樓,仲要餐餐挨貴飯,真係要多得大地主。

=============================================

中小型代理行大匯集 Yahoo!搜尋器筍盤最多最齊