雅虎香港財經 【樓市贏家】傳媒作故仔 煉就假旺市（徐峰）
近幾年樓價升到火紅火綠，原因有好多，不過筆者經常認為，一班傳媒或多或少都是樓市推手，絕對是令到樓價火速上升的其中一個重要因素。
本港樓價持續上升，原因有很多，可能是地少人多，又或者是低息環境、內地人湧港掃貨、政策問題等等，但無可否認，一眾傳媒日日作出嘩眾取竉的報導，推動買家失去理性入市，間接推動樓價上升。
還記得有次跟一位資歷深厚代理食飯，席間有幾位記者大佬打電話來收料，問市場是否有某一單極高價的成交，該位代理初時都好聲好氣同位記者講，嗰個價錢只是叫價，而且個單位仲未賣出，只是有買家傾過吓。
不過個記者死咬唔放，於是就同個記者講，我答你又唔信，你想點寫就點寫啦，隔了一陣，即時新聞出了，陸續有其他記者打來問同一樣嘢，呢位代理朋友都解釋只是某記者作料。
記者作料，當然係操守問題，但很多時他們都只是因應高層的要求，作出誇張的報導，例如市場上總有一些業主亂咁叫價，一間公屋叫到700幾800萬，山頂大屋呎價叫到三四十萬，無錯，呢類報導寫出來有一定收視，但這些放盤明顯只是亂咁叫價，一方面希望可以扑傻瓜，又可以抬高身家，不過被傳媒報導後，市場就有錯覺這個就是市價。
而很多時某些受訪者的一句金句，被傳媒無限重播後，潛移默化影響大眾思維，就好似幾年前一個師奶大罵班睇淡樓市的專家，網上點擊率好高，某傳媒於是在這幾年間到時到候便重播一次，相信些小都會影響小市民對樓市專家的睇法。
雖然，班記者大佬日日對住個市，對樓市始終都有丁點知識，他們寫的東西都有點參考價值，但當知道他們的做法後，或者只是害群之馬的做法後，對某些報導最好都係參考吓就算。
=============================================
