【樓市贏家】個市冧未?小心地產版標題黨(徐峰)
近排睇報紙,好多所謂分析員同地產大頭都開似唱淡個市,某啲報紙又日日報話邊度減價幾多成交,原因都係講緊加息、政府政策、貿易戰等等,筆者今次主要唔係要同大家分析個市未來會係點,始終出面專家多的是,又或者大家身邊都有好多師奶可以俾意見,但筆者要講嘅係,睇報紙記住睇內文,唔好俾標題黨毒害。
筆者先舉個例,好似行內出晒名的「毒果」,平時都鍾意唱淡個市,呢排利淡因素多,自然唔放過任何機會啦。早排就出咗段新聞,用「屯門龍門居累劈百萬沽」,條題夠晒吸晴啦,本身屯門樓都已經唔算咩天價,仲要劈價百萬,係咪大冧市喇?但睇吓內文,「累劈逾100萬元至595萬元成交,但成交價仍創屋苑新高,呎價10,051元創同類單位新高」。
筆者即時心諗,劈咁多都創新高,咁都算平賣嗎?報道唔可持平啲嗎?係都要誤導公眾嘅。睇吓同一單成交,佢對家「方向報」條題就寫「龍門居劈百萬沽 照創新高」,另外有份阿爺報就寫「居屋叫價離地 劈百萬仍創新高」,呢啲咪叫專業囉,劈價同創新高兩個事實同時起題而又唔覺肉酸,唔係話你唔專業,但你專業咗去另一個方向囉!
你以為係個別事件,再早多一陣子,又係毒果,整條題「居屋連環成交 天馬苑減價賣」,不過睇吓內容,「黃大仙天馬苑一個一房單位,於自由市場減價11萬元以539萬元沽出」,你減得嗰11萬就咪拎出嚟講啦,不嬲買二手樓都會講價,11萬呢啲最多叫「可議價」囉!再睇落去,「呎價1.53萬元,呎價創下該屋苑新高紀錄」,咁樣係咪真係叫減價?
不過話時話,其實現時二手市場所謂的減價,根本只可以形容為「心雄業主叫價回歸現實」,叫價叫到天咁高,最後減少少俾你,減完都仲係好貴,情況就等如新地話你知佢「時光倒流價」賣樓,但對吓價單其實都加咗唔少價一樣,所以筆者經常都話,睇新聞係提供咗好多資訊俾你,但千祈唔好信到十足十,要加自己分析先好行動,買錯嘢賣錯嘢,唔通你打去毒果投訴,佢就會賠錢俾你咩。
=============================================