【樓市贏家】分期買電視 搞到按揭唔批?(徐峰)
買電視?分期啦!買電話?分期啦!依家稅貸咁平,一個月供少少,借吓啦!但你有無諗過,有一日到你要買樓的時候,可能就是因為你部電腦未分完期,而買唔成樓?
話說近排有位朋友,千辛萬苦終於有機會買樓,在睇樓前就問過筆者意見,計算一下以他的收入可以買甚麼價錢的樓,以及大約在哪些地區會有選擇。筆者粗略幫佢計過下數,以他月入兩萬幾蚊計,借二百多萬應該不成問題。
誰知道隔兩日筆者又收到這位朋友電話,話問過銀行,計到盡可以借的錢比筆者幫佢計條數差幾十萬咁多!筆者都唔係好明,本人也是上網用銀行的按揭計算機計數,而這位朋友一向都好自律,不會欠卡數又不會借錢,何解會借唔足呢?
於是這位朋友再去銀行問,一問之下發覺,原來他早半年前添置了幾件家電,用信用卡做免息分期,打算個個月俾少少感覺無咁肉痛,誰知就係因為這筆分期數,令銀行批少幾十萬的按揭額。
無錯!只是一條一萬幾千,一個月供千餘元的免息分期,就過唔到壓力測試,借少咗按揭,差點買唔成樓。結果這位朋友要跟信用卡中心申請提早還款,才能成功借錢買樓,否則真係要喊三聲。
其實為甚麼做一萬幾千元的分期會有這麼大影響?原因是銀行評估可以批出幾多按揭金額時,會把你所有債項加入作考慮。但銀行並不是以你原本可以借的金額,減去你欠債總數,而計算出你可以借的按揭,而是以你每月最高可承受的供款額,減去你支付中的每月的供款額(例如電器分期),所以才會借了一萬幾千元做分期,但做按揭卻借少幾十萬的情況。
話時話,現時新盤咁多撻訂,當中很多都是按揭出了問題,唔知入面有幾多是跟購物分期有關呢?