香港股市 已收市

【樓市贏家】升市難買樓實錄:銀行估價追唔上 (徐峰)

樓市調整短短數月後已極速回復升勢,部份早陣子決定「睇定啲」的準買家,亦再度出動睇樓,令二手盤源再度緊張,筆者有位親戚,本身已經有樓在手,亦忍不住出來睇樓,希望可以買個單位收租,之不過,筍盤一早已被吸納,現時市場上不少叫價,都比銀行估價高出一截。

這位親戚目標在旺角、太子一帶,喜其方便、好收租,部份樓齡較高的甚至有收購重建的潛力,不過,由於這類物業樓齡一盤都有咁上下,所以按揭成數不會高,可以400幾萬樓都要付一半首期,所以這位親戚目標都是買400萬多少少的單位。

近日筆者都有一同去睇樓,區內的地膽代理講,原本新年前都有唔少400萬左右的單位可以選擇,面積不大,約在200尾到300頭左右,不過,新年後已極速被掃清,令區內現時500萬樓下的單位只餘下數個放盤。

於是筆者就同親戚一同去睇其中一個,價錢貼近500萬,樓齡50幾年,大約320呎左右,連一個天台,表面上好似不錯,不過親戚一見到個天台,就即時卻步,他說,個天台細到放狗都嫌細,向大街又放不到組合屋,但左右隔離全部僭建有住人,連燒烤都不可,即是一個無價值的天台,但業主叫價時又計埋天台的價值,即是俾錢買一個用不到的地方,再加上業主叫價近500萬,但銀行估價只估到450萬,即時比一半首期還要再貼多數十萬元差額,所以即時放棄這個單位。

好,到另一個,同一條街,樓齡都是50多年,都是300呎左右,這個相宜一點,叫400多萬,本身已「劏」成兩個套房,親戚本身諗住連租約都不錯,至少買入後不用而等租客,又不少俾租出單位的佣金,不過,當打電話去銀行問估價,銀行一聽到是太子某某街後,即時問,「你不會是買劏房嗎?」劏房做不到按揭,而且,在劏房集中的黑點,銀行做估價或做按揭前,好大機會要到現場視察,會比一般的地區嚴謹,一聽到這樣,親戚已心知買入單位後很大機會做不到按揭,於是又再打退堂鼓。

=============================================

中小型代理行大匯集 Yahoo!搜尋器筍盤最多最齊