雅虎香港財經 【樓市贏家】只許大財團炒地 不許小市民炒樓（徐峰）
香港歷年來都是一個炒賣城市，樓要炒，股票要炒，就連波鞋杯面都炒一餐，的確，炒賣一向都是香港人的本性，亦養活了很多人，但在現今的物業市場，政府就只容許大財團炒地，小市民炒就樓就要徵重稅，這跟古時只許州官放火，不許百姓點燈有何分別？公平咩？
還記得幾年前政府初推SSD，當時很多地產界人士都話，政策只會短暫壓抑樓價，但長遠而言會令二手盤源收窄，長遠都是會令到樓價上升。姑勿論當時那些高人是要做生意才作出有關言論，還是真心推算到，但幾年後的今日，樓價的確比SSD推出前高一大截。
筆者咁講，並唔係要鼓勵炒風，亦唔係要講話政府應該減辣，只係想講，政府做事應該要一視同仁。如果你有留意新聞，都會知道過去一年就有好幾幅官地二手甚至三手售出，最惹火必然要數海航同建投，早年幾兩年200幾億鯨吞啟德四幅官地，當時樓面地價超過萬三，足足比同區幾幅地樓面呎價5至6千高出一倍有多，引來大量花生友「睇你點死」的心態。
結果，有3幅經已賣出，由會德豐同恒基接手，不過其實佢哋賣出口價比買入時只係高些少，估計都係同公司財政問題有關，唔似存心炒地，可以真係公司財務問焗住賣地救火。
不過呢，有啲例子就幾明顯係炒地嘅，好似俊和2014年用21億幾買入的馬鞍山白石地，2017年6月用27億幾賣俾宏安，個宏安轉個頭喺8月又用24億賣六成權益俾碧桂園，幅地樓面地價由2014年的5500幾蚊升到舊年的近10500，兩年幾勁升九成，好明顯係一個炒賣動作。而恒基2015年用36億幾投得的屯門管翠路地皮，今年1月時亦以66億賣俾恒大，兩年半勁賺八成。
咁政府又點回應呢？咪就係不斷耍太極，話係個別事件，話無違反地契，唔打算加入條款限制官地二手買賣囉，仲話升市下地皮二手成交價比一手買入價貴很正常。筆者聽完真係燥燥地，炒地就話無違反地契，升市賣貴咗好正常，咁我炒太古城又有違反地契咩？升市層樓賣貴好唔正常咩？點解炒樓要俾SSD炒地唔駛？你話公司轉讓所以唔使，咁點解公司名買地又唔收30%辣稅呢？到底政府政策點先可以服眾？
=============================================
